Di mahadlok, mangandam

Ang mga tawag sa hulga sa bomba nakamugna og tumang kahadlok. Nakapaundang kini sa klase sa tanang pampublikong mga tunghaan sa dakbayan sa Sugbo. Bisan tuod kon basehan ang nangaging mga hitabo sa bomb threat nga binuang lang diay, daghan gihapon ang nangaratol, labina ang mga ginikanan sa mga bata.

Dunay tunghaan nga nagub-an og bahin sa koral kay namugos ang mga ginikanan sa pagsulod kay nagdali nga mokuha sa ilang mga anak.

Apan makatabang ba ang kahadlok sa ingon niani nga sitwasyon? Di. Momugna na hinuon kini og kagubot ug kaguyaling nga posibleng mosangko sa laing problema. Posibleng duna pay mangaangol.

Ang labing maayong buhaton mao ang pagkalma. Itugyan ang tanan ngadto sa mga awtoridad, apil na sa mga magtutudlo.

Kon ang mga ginikanan mopakita og kahadlok, motakod usab kini sa kabataan. Tungod lang sa wa pa makompirmar kon tinuod ba ang gisulti sa nanghulga, nagubot na hinuon ang sitwasyon.

Kon basehan ang nangaging mga bomb threat, wa pay bisan usa nga tinuod. Ang nangaging mga pagpamomba sa ubang mga dapit way warning. Nidiretso ra og buto ang mga bomba.

Bitaw, sagad sa mga bomb threat nga natinuod naa sa salida sa sine. Apan di sab angay nga isalikway nga di tinuod. Apan ang angay nga buhaton kon duna man, di maratol. Kay kon binuang ang bomb threat, nahatagan og katagbawan ang nagbinuang, nagkatawa na sa resulta sa iyang kabuang. Sa sunod, kon dunay bomb threat, ayaw karatol. Ang mga tunghaan ug ubang mga institusyon, kinahanglan nga dunay protocol nga pagasundon aron kon dunay samang sitwasyon, nakahibawo na ang tanan kon unsay angay nga pagabuhaton.

Ang nahitabo niadtong Lunes maoy usa ka dakong leksyon. Klaro nga way bisan usa nga nakapangandam.