Away sa basura
Nakurat ako sa report nga usa ka concerned
citizen ang misuwat kang Presidente Rodrigo Duterte kalabut niining, sumala pa, deal tali kang kanhi Cebu City Councilor Jun Pe ug kanhi Cebu
Customs district collector Koko Holganza ug sa usa ka Koreano aron ilabay ang basura nga gisakay sa barko gikan sa Korea ngadto sa Inayawan sanitary landfill.
Nahangangha ako sa maong balita kay nangita na gani ang Cebu City og laing kalabayan sa basura tungod kay gisugo na nga pasirhan kining landfill sa Department of Environment and Natural Resources (DENR).
Kon tinuod kining maong balita, buot bang ipasabot nga mahimong labayan lang kini sa basura gikan sa Korea samtang mangita kitag dapit nga kalabayan sa atong kaugalingong basura? Dili kini madawat sa mga molupyo sa Cebu Ciy kay ang ilang buhis mao may igasto sa paglabay sa basura ngadto sa ubang dapit.
Siguro akong gamiton kining maong isyu sa mga kaatbang ni Mayor Tomas Osmeña labi kay kini sila si Pe ug Holganza pulos niya mga suod nga higala.
Hinaut pang hunongun na nato kining pamolitika ug kinahanglang ipatuman nato ang mga environmental laws aron matunhay na kining atong pagpuyo.
Hinaut pa usab unta nga ipakita na sa DENR ang ilang ngipon ug hambatun kining mga malapason sa ilang mga lagda ug reglamento.
MARTIAL LAW EXTENSION
Gipangayo ni Pres. Duterte nga lugwayan ang martial law sa Mindanao nga matapus na sa iyang ika-60 ka adlaw ugma. Gipangayo niya sa Senado ug sa Ubos Balay-Balauranan nga ang extension hangtod sa katapusan karong tuiga.
Sigun sa atong gipaabut misud na usab ang pulitika sa maong isyu. Si Sen. Antonio Trillanes nga kritiko ni Pres. Duterte dili na buot nga lugwayan pa kini. Ang uban niyang mga kauban nga nakakita tingali sa kamahinungdanon sa balaud militar sa Mindanao miinsister nga lugwayan kini og 60 ka adlaw. Suma sa ubang mga sakop sa majority nga mas sayon ang
60-day extension kaysa molapas pa niini.
Mituo ako sa mga katarungan nga gihan-ay sa administrasyon aron pag- justify sa ilang gipangayong extension apan uyon ako sa paglugway niini og 60 ka adlaw lang usa aron dili kaayo mabalaka ang mga turista ug mga negosyante ingon man ang mga tawo nga wa pa mahuwasi sa kahadlok sa martial law nga gipakanaug ni anhing presidente Ferdinand Marcos.
Ako nakasiguro nga kon gikinahanglan pa gyud unya ang martial law extension, andam ug tagana ang mga senador ug kongresista sa paglugway niini labi na og pareho karon nga way abuso sa military ug kapulisan nga nahitabo sud sa martial law
proclamation sa Mindanao.