Umento sa funeral benefits
Gipirmahan ni Presidente Rody Duterte ang Executive Order No. 33 niadtong Hulyo 17 nga nagpa-usbaw sa funeral benefits sa mga kawani sa publiko ug pribadong sector ubos sa Employees Compensation Program (ECP) gikan sa P20,000 ngadto sa P30,000.
“The current Employees Compensation (EC) Funeral Benefit for both the private and public sectors is no longer sufficient to cover ordinary funeral costs,” matod pa sa presidente.
Sakto ang ilang giingon nga kon mahal man ang pag-atiman sa inadlaw nga panginabuhi, mahal sab ang pagkamatay. Matod pas taga Cabadiangan, mao kana nga daghan ang nag-agwantang mabuhi inay moutong na lang kay dakog gasto kon mamatay.
Ang ECP usa ka social insurance program sa gobyerno nga gitumong sa paghatag og benepisyo sa mga kawani sa gobyerno ug pribadong
sector ingon man sa ilang mga beneficiaries kon sila masakit, maangol o kaha mamatay nga may kalambigitan sa ilang trabaho.
“There is a need to continually improve benefits under the ECP to make them more responsive to the welfare and development needs of occupationally disabled workers,” matod pa sa presidente.
Dakog matabang ang maong mando sa pangulo. Busa karon, hamugaway na ang mamatay. Di kay puston na lang og banig nga ginama sa lilas gikan sa udlot sa buli ug ilubong.
Kaniadto sa Cabadiangan, kon dunay mamatay, ilubong dayon. Wa nay kinahanglan nga embalsamahon ang namatay. Ang mga panday da maoy mohimo sa lungon.
Ang problema kay way bildo nga magamit. Busa, dihay usa ka higayon nga ang samin maoy gigamit sa mga panday ug gibutang sa lungon ibabaw sa nawong sa namatay.
Hastang kuganga sa mga tawo nga motan-aw sa haya kay inig tan-aw nila sa nawong sa namatay, ang ilang mang nawong maoy ilang makita.
Matod pa sa presidente, ang Employees Compensation Commission (ECC) niluwat og duha ka resolusyon sa buwan sa Mayo ug Hulyo nga nagpaumento sa funeral benefits sa mga kawani sa publiko ug pribadong sektor.
Ang maong benepisyo adto kuhaon sa State Insurance Fund (SIF). Iyang gimandoan ang ECC, ang Social Security System (SSS) ug ang Government Service Insurance System (GSIS) sa pagpagawas sa pundo alang sa dugang funeral benefits.
Kaniadto, pas-anon ang minatay padung sa sementeryo. Kinahanglan pang mag-utan og monggos aron makusgan ang magpas-an. Karon, duna nay purlon.