Mga artista sa Mulawin vs. Ravena nibisita sa Cebu
Nibisita sa Cebu ang mga Kapuso nga artista sa Mulawin vs. Ravena niadtong Sabado. Nakaistorya namo sila si Bea Binee, Derrick Monasterio, Kiko Estrada, Bianca Umali ug Miguel Tanfelix.
Pulos sila nangandam alang sa teleserye, seryoso sa trabaho, may damgo nga mohuman og kurso ug pulos way love life. Aw, basta mao nay ilang tug-an.
Wa pay seguro kon makabisita ba sila si John Lloyd Cruz ug Sarah Geronimo sa Cebu alang sa pelikulang Finally Found Someone pero wa pa mosurender ang promo diva nga si Josie Pereyra.
Basin pa diay. Isalida ang Finally Found Someone sugod sa Hulyo 26.
Niadtong Hulyo 7, nagsaulog ang Carcar City sa iyang ika-10 nga Charter Day. Ispesyal ang kasaulogan kay mao usab ang pag-abli ug pagbendita sa bag-ong city hall niini.
Sa bisperas, gipahigayon ang Festival of Festivals. Matud ni Mayor Nicepuro Apura, Bise Mayor Mario Patricio Barcenas ug Kons. Mercy Apura, unang higayon nga kompleto ang 15 ka barangay nga nipasundayag 15 ka festival.
Kini mao ang Kabilin Festival (Poblacion 2), Tsinelas (Liburon), Kalambuan (Pob. 1), Sundang (Pob. 3), Takoy (Guadalupe), Daruhan (Calidngan), Tagakan (Napo),
Amakan (Valencia), Buhilaman (Buenavista), Acacia (Perrelos), Patubigan (Can-asujan), Bolinao (Bulinawan), Yub Yub Ha Ha (Tuyom), Pinya (Ocana) ug Sapatos (Valladolid). Nindot ang pasundayag,
costumes ug props pero ang akong tapad nga mas himantayon kay nako, nikomentaryo nga Sinulog kuno ang mga steps ug pila lang ka grupo ang nigamit og props nga haum sa festival.
Niuyon ko niya. Hinaut nga sa sunod, ipahaum na sa mga choreographers ang steps sa
mananayaw sa festival mismo.
Lifestyle of the Rich and
Famous. Usa kini ka programa sa telebisyon kanhi. Ingon-ingon ani ang among gibati di pa lang dugay dihang nibiyahe kami sa kadagatan sa Mactan ug nisuong sa duha ka mga taytayan nga nisumpay sa isla sa Mactan sa isla sa Cebu.
Sakay kami sa yate nga P/Y Jokai I nga gipanag-iya sa Jokai Marine Int’l. Inc. ug nipasiugda sa Sunset Cruise. Kuyog nako ang pila ka mga higala ug mga modelo.
Didto kami nanukad sa Punta Engano terminal, nihanggap sa preskong hangin ug nalingaw sa mga talan-awon sa dayong pagsalop sa adlaw ug sa bagong gabii.
Mahimo diayng maabangan ang yate alang sa lainlaing mga kalihukan. Nindot.