Mga abog sa kinabuhi

Ilang gitagbaw ang ilang kaugalingon pinaagi sa pagdimdim sa mabugnawng alak sulod sa suki nilang Wine & Dine Restaurant. Alang Robert kini na tingali ang katapusan nilang panagtagbo. Panagtagbo tungod sa arte. Si Shaun usa ka nobelista; si Bart usa ka magbabalak. Si Oliver, magsusugilanon ug si Javier, usa ka pintor. Ang ilang mga katawa karong gabhiona ingon sa nagtug-an nga dili ang tanang butang maangkon sa garbo. Ang tanan kinahanglan ipaagi sa hustong pagbati – sa arte, sa gugma, sa kasilag, sa kalisdanan sa patayng umaabot.

“Sunod semana molarga na ko,” mipahibawo si Javier dayong tungab sa baso nga puno sa beer.

“Asa ka man punta, Do?” nangutana si Oliver. “Sa London.” “London?” “Oo, London. May kontak ko didto. Ang akong trabaho didto mao ang pagpintal,” miipis si Javier og beer sa iyang baso gikan sa botelya.

“Nindot kana. Imong gisunod ang agda sa imong arte. May dalan ang matag tawo, di ba?” timang ni Bart nga mitan-aw kang Oliver.

Mitungok si Javier. Alang kaniya, gusto pa niya nga bugtawon ang matang sa arte nga mogakos sa gana sa kinabuhi.

“Abog... abugon ang dalan nga atong gisubay! Di ba, mga parts?” misulti si Shaun nga miginhawag halawom.

“Oo, abugon, grabeng abog, abog nga dili makita. Abog nga dili maanod sa tubig,” matod ni Bart dayong dungoy sa lamesa.

“IKAW ang midaog sa unang ganti, Ver!” ni Bart ngadtong Oliver. “Unsay imong gibati ron nga imo mang giharos ang maong panagtigi sa utok?”

“Walay nausab, Parts,” hinay ang tingog ni Oliver.

“Mao nay tinuod nga pagbati. Dili ka hambugero, Parts. Dili ka gutom sa dungog. Usa ka sa mga ehemplo sa ulipon sa arte,” mitutok si Bart kang Oliver.

“Ugma di na tingali ko mosuwat pa,” hinayng tingog ni Oliver. “Gusto kog kalinaw. Lahi nga kalinaw...”

“Ngano, wa diay kalinaw ang panuwat, kining gitawag og literatura?” ni Bart nga miigham.

“Oo, way kalinaw. Duna tay hinagiban apan dili alang sa gubat. Igo lang ta mosuwat diha sa kangitngit. Hilom ang atong kinabuhi ug hilumon ang atong pagka tawo.” May gikuha si Oliver sa iyang bulsa, usa ka larawan.

“Kinsa nang litrato?” nangutana si Bart.

“Abog!” ni Oliver. “Abog... aboggggg!”

“Kang kinsa lagi nang hulagway?” mitaas ang tingog ni Bart.

Gitunol ni Oliver ang hulagway kang Bart. Gidawat ni Bart ug iyang gitan-aw. Iyang nakita ang usa ka dakong bilding nga nasunog.

“Sunog! Nasunog kining bilding. Ikaw nag-kodak ini?” Mitan-aw ang magbabalak sa magsusugilanon.

“Oo, ako. Kitang tanan mahimong abog. Habog ka man. Hawod ka man. Adunahan ka man. Gamhanan ka man. Adto ta tanan pauli sa abog kay may utlanan ang tanan. Kitang tanan sunugon sa atong tanlag!” Mitindog ang magsusugilanon ug misenyas nga mogawas na sa restawran.

Gitutokan ni Bart ang hulagway diha sa iyang kamot. Ug dihay pagbati na mikusi sa iyang kasingkasing. Kalit gimingaw siya sa iyang arte nga iyang gibiyaan.

(KATAPUSAN)