GILAS NAKABAWI
Lab-as pa gikan sa ilang pagkapukan sa mga kamot sa South Korea niadtong Miyerkules, ang Gilas Pilipinas mainiton nga mibakwi sa kaparutan kagabii pinaagi sa pagpukan sa Iraq, 84-75, sa 39th Jones Cup sa physical nga panag-engkuwentro didto sa Taipei Heping Gymnasium.
Human sa kapugdol sa ilang
three-point shots sa 83-72 nga kapildihan sa South Korea, ang Gilas kagabii mibawi ug gipakita ang ilang kahanas ug kalantip batok sa Iraquis aron angkunon ang ilang ikaupat nga kadaugan sa unom ka duwa.
Wa na man tuoy paglaom alang sa kampyonato, apan ang kadaugan maoy makapataas sa moral alang sa kampanya sa Pilipinas sa Fiba Asia Cup sa Lebanon sunod buwan diin ilang ikakontra usab ang Iraq sa group phase.
Si Matthew Wright mipabuhagay og duha ka tres, usa usab gikan kang Roger Pogoy nga maoy naghatag og marka sa pag-arangkada sa Pilipinas nga giduslitan usab sa usa ka
fast-breaking dunk ni Kobe Paras aron pagtapos sa first half, 36-22, nga labaw.
Gani nakaposte pa ang Gilas og 18 puntos nga bintaha, 67-49, human sa laing tres ni Kevin Ferrer sa uwahing bahin sa third quarter. “We didn’t want to give them the extra motivation ahead of the Fiba Asia, but we also want to get a feel of how to play against them,” matod ni Gilas coach Chot Reyes human sa mainiton nga panag-engkuwentro nga nakamugna og pipila ka mga technical fouls gikan sa matag habig. “So in that respect, that will be a big help.”
Sa kinatibuk-an, ang Gilas adunay pito ka triples sa threepoint area nga dako kaayog deperensa sa iyang 26 ka itsa nga usa lay nahimo batok sa South Korea niadtong Miyerkules.
Midugang og 13 puntos ug unom ka assists si Kiefer Ravena ug 10 puntos usab ang natampo ni Jio Jalalon kinsa milangkat og upat ka rebounds ug two assists.
Ang import nga si Mike Myers, gawas nga milabnot og 18 ka rebounds, aduna usab kini 16 puntos. Mga puntos: Philippines (84) – Myers 16, Ravena 13, Pogoy 12, Cruz 10, Jalalon 10, Wright 8, Standhardinger 4, Jose 4, Ferrer 3, Paras 2, Parks 2. Iraq 75 – Mayfield 29, Al-hchaimi 17, Abdullah 8, Khajehzadeh 7, Ismael 4, Hameed 4, Alazawi 3, Aljuboori 3, Altameemi 0, Talib 0, Hamzah 0.