27 KA MGA CONTACT LENS ANG NAKUHA
Nakugang ang mga ophthalmologist sa tambalanan sa Birmingham, England sa ilang nakaplagan sa mata sa usa ka 67-anyos nga babaye. Di mominos 27 ka contact lenses ang nakuha sa usa ka mata sa ginang nga maoy hinungdan sa paghanap sa panan-aw niini. Ang babaye ipaubos unta og
cataract surgery niadtong Nobiyembre human kini nireklamo nga nag-uga na ang iyang mata ug dili na makakita og klaro, sumala sa Optometry Today.
Nakit-an sa mga doktor sa Solihull Hospital sa Birmingham ang “blueish mass” sa usa sa mga mata niini.
Dihang gisusi, una nilang nakaplagan ang 17 ka lenses nga nagsapawsapaw sa tuong mata sa ginang, matod sa specialist trainee ophthalmologist Rupal Morjaria, author sa British Medical Journal.
“We were really surprised that the patient didn't notice it would cause quite a lot of irritation while it was sitting
there,” dugang ni Morjaria. Dugang 10 ka contact lenses ang nakuha gikan sa samang mata.
Si Morjaria niingon nga kini ang unang higayon nga nakasugat sila sa susamang kaso.
Sa taho sa CNN, ang ginang magsige na og sul-ob og disposable contact lenses sud sa 35 ka tuig. Wa maklaro kon pila na ka tuig natanggong ang maong mga contact lens.
Si Morjaria nidugang nga wala na idayon ang cataract
surgery sa ginang human makuha ang mga contact lens tungod kay peligrong mag-impeksyon ang mata niini. /