ZOE SA 1ST BIRTHDAY
Diriyot mawagtangan og paglaom si Jane Cantal Gabayan nga makabaton og dugang anak.
Kaduha siya nakuhaan ug kini ang labing sakit nga kasinatian nga iyang naagian isip usa ka inahan.
Unang nakuha ang iyang gisabak niadtong 2012 gumikan sa kahago sa trabaho.
Pagka 2014, namabdos og balik si Jane apan wa magdugay nakuha na usab ang iyang gisabak.
Taliwa sa pagsulay ug kasakit nga iyang nasinati, siya padayon nag-ampo sa Kahitas-an ug naghangyo nga dunggon ang iyang pangaliyupo.
“Nag-ampo ko nga hatagan ko og baby ma girl man o boy, dawaton gyud namo,” paambit sa 28-anyos nga inahan.
Sa matag simba ni Jane sa National Shrine of St. Joseph sa dakbayan sa Mandaue nga duol sa iyang gitrabahoan kaniadto, dili niya makalimtan ang pagpamarayeg nga mahatagan og dugang anak.
Tuod, ang iyang pag-ampo nadungog, human sa 10 ka tuig laing bata ang madugang sa ilang pamilya. Ug nasundan ang kamaguwangan nga anak nga si Leo Sebastian "Baste" Gabayan.
Niadtong Nobiyembre 2015 dihang iyang nakompirmar ni Jane nga duha ka buwan na ang iyang gisabak.
Aron maseguro ang iyang pagmabdos, gipaundang siya og trabaho sa iyang bana nga si Leonides Gabayan, 42.
Kulbahinam ang gender sa bata tungod kay dili maklaro kon babaye ba kini o lalake atol sa mga ultrasound.
Alas 10:56 sa gabii niadtong Hulyo 14, 2016, dihang nakompirmar ni Jane nga usa ka mahimsog nga batang babaye ang iyang gihimugso sa St. Anthony Mother and Child Hospital sa siyudad sa Sugbo.
Ang bata ginganlan nila og Zoe.
Niadtong Sabado sa miaging semana, gisaulog sa pamilyang Gabayan ang unang
birthday ni Zoe pinaagi sa Children's Party nga nakapalingaw sa mga bisita. /