Prov. tourism officer mihangyo sa kagamhanan sa Alcoy

Gihangyo sa Provincial Tourism Office ang lokal nga kagamhanan sa lungsod sa Alcoy nga mopalabang na og ordinansa pagpaminos sa polyusyon sa kasaba sa mga sakyanan labi na mga motorsiklo nga molabay sa lasang.

Si Joselito “Boboi” Costas, pangu sa PTO, namahayag matugaw ang wildlife sa kasaba sa mga motorsiklo nga moagi sa lasang.

Personal niya gipaabot ang

hangyo ngadto kang Alcoy Mayor Michael Angelo Sestoso atol sa iyang pagbisita sa lungsod niadtong Biyernes ug Sabado kauban si Bise Gobernador Agnes Magpale ug mga sakop sa media.

Naobserbahan ni Costas ang kasaba sa mga tambutso sa mga motorsiklo nga nangagi sa karsada dapit sa lasang sa Barangay Nug-as nga maoy pinuy-anan sa lainlaing mga klase sa langgam, kahoy ug mga tanom. “I think it is really high time for Alcoy to pass an ordinance minimizing noise pollution especially dinhi dapita ba,” pahayag ni Costas nga ang gipasabot ang lasang sa Barangay Nug-as.

Gawas niini, gikinahanglan usab ang ordinansa bahin sa

users' fees sa mga turista nga moduaw sa Alcoy, usa ka 5th

class municipality, aron motan-aw sa talagsaon ug pangitaunon nga klase sa mga langgam ug tanom.

Moabot sa 1,600 ka mga ektaryas ang gilapdon sa lasang sa Alcoy nga pinuy-anan sa 200 ka mga Cebu Hawk Owl, Black Shama (siloy), Cebu Mistletoe ug 87 ka klase sa ferns.

Si Sestoso niingon nga paninguhaon sa lungsod nga mapasar ang mga ordinansa karong tuiga. Ang bird watching ug trekking sa Alcoy ang nalakip sa 'Big 5' nga gikatakda ilusad sa

provincial government karong sunod buwan.