BRT, repasuhon o hunungon?

Niawhag si Presidential Assistant for the Visayas Michael Dino kang Presidente Rody Duterte nga repasuhon ang P16.9 bilyunes nga Cebu Bus Rapid Transit (BRT) project.

Ang BRT project, nga may orihinal nga budget nga P10.6 bilyunes, gisugdan na sa pagpatuman. Nisaka ang budget niini tungod sa pagpalit sa road-right-of-way (RROW).

Apan matod pa ni Dino, angay nga repasuhon ang “viability” sa maong proyekto isip mass transport system. Niagi na kini sa daghang pagtuon sa World Bank, apan kinahanglan gihapong repasuhon?

Matod pa ni Dino, ang iyang suwat nga nag-awhag sa pagrepaso sa BRT nadawat na sa buhatan ni Presidente Duterte. Matod pa niya, ang BRT di makasulbad sa kahuot sa trapiko sa syudad.

Apan niingon siya nga wa siya moawhag nga kanselahon ang maong proyekto. Pero kon mapamatud-an nga di kini viable, nga kini di makasulbad sa kahuot sa trapiko, di ba kini mosangpot sa pagkanselar sa maong proyekto?

Ang BRT mogamit og mga bus, di tren. Busa way makaingon nga kini nadiskaril kon kanselahon. Apan makaingon kita nga ang BRT, ang pet project ni Cebu City Mayor Tomas Osmeña, niabot sa dead-end.

Managlahi ang gusto nila ni Osmena ug ni Dino. Si Osmena dugay nang nangusog alang sa BRT, samtang si Dino gusto nga ang Light Raiway Transit (LRT) system ang ibutang dinhi sa Sugbo.

Matod pa ni Dino, hinog na ang Sugbo alang sa usa ka LRT system sa pagsulbad sa nagkagrabe nga suliran sa trapiko. Gawas pa, nagtuo siya nga di makasulbad ang BRT sa maong suliran. Bitaw, angay tanawon kon hain ang mas maayong paagi. Ug kon mahimo gamiton ang duha ka sistema.

Wa mag-inusara ang BRT project sa syudad sa pagkalangay ug pagsupak. Nahitabo usab kini sa mga BRT project sa Silicon Valley, California ingon man sa New Delhi, India.

Ang sagad gilalisan mao nga duha ka lanes sa karsada eksklusibong sa BRT, busa mogamay ang karsada nga mahibilin alang sa ubang pribado ug publikong sakyanan.