Sa unang tuig ni Digong

Kontra o pabor sa administrasyon, naghinamhinam nga nagpaabot sa state-of-the-nation address (Sona) ni Presidente Rodrigo 'Digong' Duterte karong hapon atubangan sa hiniusang sisyon sa Kongreso ug kini ipalanog sa tibuok nasod pinaagi sa multi-media nga kahimanan. Si Duterte gipaabot nga molakbit sa pagtuki sa mga kontrobersiyal nga isyu ug motaho sa mga kalamposan sa iyang unang tuig isip pangulo sa nasod. Dugang gibantayan, dili kaha makapugong ang Bisaya nga presidente sa pagpamalikas human madala sa iyang pagbati? Nabatasan na kini ni Digon.

Gikan sa kampanya sa miaging eleksiyon sa pagka presidente hangtod sa iyang pormal nga paglingkod sa pwesto, si Duterte giilang labing init ug kontrobersyal nga presidente. Sila si kanhi Presidente Ferdinand Marcos, Joseph Estrada, Gloria Macapagal Arroyo ug ubang kanhi kontrobersiyal nga medyo humot ug kalma sa ilang unang tuig sa administrasyon.

Bisan wala ug tuo ang pag-ataki ni Duterte, lakip na sa pagapil sa international human rights groups ug pipila ka mga magbabalaud sa Estados Unidos, apan taas gihayon kaayo ang iyang approval rating nga mitala og 82 porsiyento subay sa ulahing survey sa Pulse Asia, Hunyo 24-29, gikan sa 78 porsiyento niadtong Marso ning tuiga. Mas mitaas hinuon.

Segurado nga magbandera kini sa taho sa presidente nga gipaluyohan siya sa bagang mayoriya sa populasyon taliwala sa mga pagsaway sa paglusad niya sa gubat batok sa pagpayuhot sa gidiling drugas, pagdeklarar o martial law sa Mindanao aron pagsumpo sa mga teroristang Maute sa dakbayan sa Marawi.

Sa internasyonal nga relasyon, gipalambo ni Duterte ang dili tradisyonal nga kaalyado sama sa Russia ug China alang sa ekonomikanhong kalamboan ug iyang gipasabot nga palig-unon ang relasyon sa "karaang higala" sama sa Estados Unidos.

Ang pabor ni Digong seguradong mosanong apan, ang kontra niya klaro nga makighiusa sa protesta-rali sa kadalanan karon.