Habalhabal masaligan kon magdali
Dunay nangutana kung wa na ba'y laing termino nga magamit gawas sa pulong habalhabal kung mosakay ka ug gipamasaherong motorsiklo.
Ang termino nga habalhabal sa naandan na. Kay bisan gani sa mga sisyon sa mga opisyal sa barangay, lungsod, siyudad ug lalawigan ang termino nga habalhabal kanunay gilitok. Ang ubang opisyal sa gobiyerno mao sab ang gilitok nga termino.
Basta gamiton na gani og pamasahero ang motorsiklo, habalhabal na ang tawag niana didto sa amo sa Kalunasan. Halos tanang dapit nga naggamit sa pinulongang Sugboanon. Di ko suheto kung unsay tawag niini sa Region 6 ug Region 8.
TRAPIK
Niadtong Biyernes sa sayong gabii, dunay koy giapas nga kalihukan sa may Nivel Hills, Lahug. Tungod kay nag-aginod ang bul-og sa trapiko, nisakay ko og habalhabal gikan sa Gorordo Ave. Bisan puwerting trapika, gibiyahe lang ni sa motorsiklo og 10 minutos. Ingon ana ka paspas ug ka dali. Makadaghan na nako ni mapamatud-i ilabi na sa dinalian nga biyahe ang habalhabal masaligan gyud.
Ug mao ni kanunay nga gihisgutan karon. Ang mga paagi unsaon nga pinaagi sa cellphone may mokuha nimo nga motorsiklo sa imong na- himutangan. Mas paspas pa sa taxi ug ubang matang sa sakyanan. Naghuwat lang ko kanus-a kini matuman apan miyentras tanto manghinaot ko nga di makalimtan ang ka importante sa pulong nga safety o luwas nga pagbiyahe. Di lang para sa pasahero, apil na sa mga drayber.
Makadaghan na ta makabalita og disgrasya nga naglambigit ug motorsiklo. Ang mga imbestigasyon nagpakita ang usa sa hinungdan mao ang rickless driving. Kung magtamod lang sa mga lagda sa pagmaneho, di magpataka og overtake, di moinom o mosuyop ba kaha hinuon, layo ra nga mosangko sa disgrasya.
Ning panahon nga nagkagrabe ang problema sa trapiko ang habal habal og ang pagtinir isip service ug motorsiklo mas modaghan pa. Disiplina sa karsada ra gyud ang gikinahanglan. Aron hingpit kini nga mapatuman taas nga multa ug bug-at nga silot ang ipahamtang sa mga nakalapas sa balaod.
SALAMAT
Sa mga nibilar ug nihatod sa lubong ingon man sa mga nihalad og pag-ampo alang sa kalag ni Agaw Jimmy Nadela, daghang salamat gikan sa nagbangutang pamilya. Niadtong Sabado, amo siyang gihatod sa iyang lubnganan sa Carcar City Cemetery taliwala sa mga pag-ulan. Rest in peace gaw Jimmy.