Taluktok sa bungtod

Nagkasabot sila si Eser ug Eyay nga magdungan silag katkat paingon sa taluktok sa mahabog nga bungtod sa Candangas.

“Lumba tag katkatay ngadto sa taluktok sa bungtod, ha, Yay?”

“Aw, ikaw god, Ser! Tan-awon kog taas ka bag hangin!”

“Wow! Challenge accepted, ha! Di kaha mahibat ang porma sa bigot mong lawas paingon sa taluktok?”

“Basta kauban ko ang guwapo kong palalab inig katkat, payts ko bisag lupig, Ser!”

“Hmmm! Hasta ko, Yay. Di ko mobatig kakapoy ug kakutas basta ang ikauban ko mao ang akong sexy nga waswit!”

“Sige. Andam na ko, Ser. Sugdan na nato ang lumba sa pagkatkat.”

“Ha!Ha!Ha! Gahinam baya ko, Yay. Anad god kos mountain climbing. Agad-agaron lang tika. Sige, tana! Let's go!”

Ug gisugdan dayon nilang Eser ug Eyay ang kinatkatay paingon sa taluktok sa mahabog nga bungtod sa Candangas. Paspas ang ilang pagsubay sa tungasong dalan-dalan paingon sa kinaibabwan. Dungan nga mikitiw ang ilang mga tiil nunot sa hinagtob sa ilang mga tunob. Nagpanikad silang duha aron klaro ang pagpahiluna sa ilang mga lapalapa sa yuta ug sa batuong dalan, “Kutas kaayo. Di ba, Yay?” “Oo, Ser. Kutas gyud. Agwantahon ko lang.”

“Apan kundisyon gihapon kaayo kitang duha, Yay, kay kauban man nato ang usag usa!

“Bitaw, Ser. Sus, wa gyud ko kabalibad ning atong katkatay kay first adventure god ni natong duha!”

“Yay, duol na ta sa taluktokan!”

“Ser, dungan tag sangko, ha?”

“Yipppeee! Abot na gyud ta, Yay! Kutas apan lalim!”

“Bitaw. Lalim man diay kaayo kining kinatkatay, Ser?”

Nakaabot gyud silang Eser ug Eyay sa taluktok sa bungtod. Didto namahuway sila ilawom sa landong sa dakong kahoy. Unya hugot silang nagginaksanay.

NAHIGMATA si Eser dihang nabati niya ang kusog nga dagpi sa iyang aping. Iyang nakita si Eyay nga nagngisi diha sa tiilan sa katre.

“Nagdamgo na sab ka nga nagkatkat sa bungtod sa Candangas, Ser?” “Nakatag-an ka, Yay.” “Kinsay imong kauban?” “Ikaw, Yay!”

(KATAPUSAN)