SAKOP SA 4P’S DILI MAPUGOS ASA PALIT

DSWD MIPAHIMANGNO, KAWANI SILOTAN KON KINI GIBUHAT

Mga kawani sa Department of Social Welfare and Development (DSWD) silotan kon mopugos SA mga sakop sa Pantawid Pamilyang Pilipino Program (4P)nga adto mopalit og bugas sa ilang kontak na nga negosyante.

Nigawas ang report nga adunay mga kawani sa DSWD nga mopugos sa mga sakop sa 4PS nga adto mopalit og bugas sa ilang kontak kon manghatag sa rice subsidy.

Matag buwan, ang mga beneficiary sa 4P’s adunay madawat nga P600.

Ihatag kini matag duha ka buwan hinungdan nga moabot sa tag P1,200 ang ilang madawat.

Si Director Maria Evelyn Macapobre, kinsa nitambong sa graduation sa livelihood program sa Dakbayan sa Talisay, nipahibawo nga wa sila nipugos sa mga miyembro sa Pantawid tungod kay ang ilang gitudlo ngadto kanila mao ang kagawasan sa pagdiskarte sa ilang kaugalingon aron sila magpuyo nga malambuon uban sa ilang pamilya.

Apan iyang gipasabot nga aduna usay mga sakop sa 4P’s ang nangita usab og pamaagi nga moasenso hinungdan nga sila na mismo ang nagnegosyo og bugas.

Hinungdan nga ila usab nga gidasig ang mga sakop sa 4P’s nga mahimong adto sila mopalit aron sila makatabang.

Hinuon iyang giklaro nga wa kini nila pugsa.

Gani, wa sila magbuot kon unsay paliton, bugas ba o sudan tungod kay ilang gitudlo ang empowerment kun paghukom ug pagbuhat sa kaugalingong kabubut-on.

Iyang gipasabot nga adunay mga estorya nga iyang madungog labot niini, apan lisod alang kanila ang paghimog imbestigasyon tungod kay way mobarog sa maong pasangil.

Gipasalig ni Macapobre nga kon duna lay mobarog, mohimo silag inbestigasyon ug silotan ang iyang mga sakop nga malambigit. /

/ ALLAN CUIZON SUNOG: Ang aerial view sa nasunog nga bahin sa Sityo Baho, Brgy. Calamba, dakbayan sa Sugbo, niadtong Lunes. Kandila ra nga nalimtan sa pagpawong ang sinugdanan sa sunog nga niugdaw og labing minos 195 ka mga balay. Estorya sa pahina 5.