KAMPANYA BATOK SA DRUGAS SA CV HINGUSGAN: DORIA

Kapulisan sa Central Visayas mas mopakusog pa sa ilang gubat batok sa illegal nga drugas, nunot sa pamahayag ni President Rodrigo Duterte atol sa iyang State of the Nation Address niini niadtong Lunes.

Matod ni Sr. Supt. Joel Doria nga sukad sa sinugdanan sa iyang pagkahimong Cebu City Director wala sila mohunong gani gipakusgan pa nila ang kampanya pinaagi sa sunod-sunod nga ronda sa kabarangayan.

Niadto lang miaging semana nakasakmit sila og 225.86 gramos nga gituohang shabu nga gibana-bana nga mobalor ug P2.6 million gikan sa nagkadaiyang barangay sa syudad sa Sugbo.

Giangkon niini nga bisan sa ilang hugot nga anti drug operation padayon nga dunay makuha nga drugas tungod usab ni sa kadali ra sa pagpasulod sa kontrabando sa syudad sa Sugbo.

Apan iyang gipasabot nga daghan na sa mga drug personalities ang nanglayas na sa syudad apan sa gihapon sa mga notadong barangay sila magkuhaan ug supply sama sa Duljo Fatima, A. Lopez, Ermita, Labangon ug barangay Lahug.

Sa barangay Lahug nakasakmit sila og 60.8 gramos sa illegal nga drugas nga gibanabana nga mobalor kini ug P717,440.00.

Sa Mambaling nakakuha sila og 65 gramos nga moabot sa P768,888 ug gisundan kini sa Duljo Fatima nga nakuhaan og P516,840 nga balor sa illegal nga drugas.

“Ang iba sa mga player natatakot na dito sa Cebu City kaya nagsipaglayas na ang iba ngunit mayron pa rin tayong makukuha dahil sa patuloy na pagdating ng mga supply galing sa Bilibid at mga jail facilities natin dito,” matod ni Doria.

Ang tibuok Central Visayas giila sa kampo Crame nga usa sa labing daghang nangasikop sa ilang kampanya batok sa illegal nga drugas ug gani nalipay niini ang bagong regional director.

Matod ni Sr. Insp. Reslyn Abella Information Officer sa Police Regional Pffice 7, nga wala mo relax ang kapulisan sa Central Visayas ug minando si General Jose Mario Espino nga ipadayon ang ilang nasugdang programa.

Una nang gitumbok ni President Duterte nga ang Sugbo mao ang drugs hotspot sa tibuok nasud nga wala usab gihimakak sa kapulisan nunot sa kadaghan sa mga nalambigit niini.