Supply sa nutrition dili angay ikabalaka: NCC 7

Gipaneguro karon sa National Nutrition Council (NNC) 7 nga magpabiling aduna’y igong supply sa pagkaon ug nutrisyon ang Central Visayas subay gihapon niining problema sa malnutrisyon.

Matod ni NNC 7 Nutrition Officer II Nasudi Soluta, nga sa Central Visayas, upat sa 100 ka mga bata ang nagpabilin nga malnourished samtang 12 sa 100 ang mubo sa ilang pangedaron.

Dugang ni Soluta nga gipalapdan pa karon sa NNC 7 ilang programa aron dili lang magpabalin nga aduna’y igong supply sa pagkaon apan aduna usab kini igong mga nutrisyon nga gikinahanglan sa lawas.

Usa sa lakang nga gihimo sa maong ahensiya kining pakigtambayayong aa Department of Education (DepEd) 7.

Nipasabot si Soluta nga aduna’y kasamtangan nga order ang DepEd nga kinahanglan nga aduna’y nutrisyon ang pagkaon ang ibaligya sa mga tinun-an ingon man dili kini baligyaan og softdrinks ug junk foods.

Isip parte sa kalihokan karon nga Nutrition Month, gibisita sa NNC 7 ang mga kananan sa Metro Cebu ug gidasig kini nga mag-andam usab og utanon gawas sa karne. Gipapilitan usab kini og sticker sa “Pinggang Pinoy” isip giya sa gikinahanglang pagkaon alang sa lawas.

“Sa atoa man gud dinhi naa ta’y stigma nga kung mokaon ta ug utan, ingnon dayon nga pobre mao nga ma-discourage ang uban mokaon ug utan kay hadlok sawayon.”

Mohimo usab og training ang NNC 7 kabahin niining Food and Nutrition Security ngadto sa Barangay Health Workers (BHWs) ug Barangay Nutrition Scholars (BNS) sa upat ka Local Government Units (LGUs) sa CV nga taas ang natala sa malnutrisyon. Lakip niini ang lungsod sa Buenavista sa lalawigan sa Bohol, Dalaguete, Alcantara ug Carmen sa Sugbo.

“Gusto namong i-capacitate ang mga BHWs ug BNS aron sa ipasusi ang kaso sa malnutrition sa ilang lugar. Dili man enough nga ang data ra maoy atong basihan. Kinahanglan nga atong i-counterchek aron dili erroneous atong data.”

Parte sa ilang monitoring kining kaso sa problema sa panglawas susama sa diarrhea, dengue, ug kining presensya sa mainom nga tubig ug pansayan.

Gihulagway ni Soluta nga nag-unang rason sa malnutrisyon kining kapobrehon diin ang NNC 7 isip parte sa Regional Nutrition Committee nakigtambayayong na usa sa ubang ahensiya susama sa Department of Labor and Employment (DOLE), DSWD, Department of Agriculture (DA) ug Department of Science and Technology (DOST), sa paghatag og panginabuhi sa kabus nga pamilya.