Mga nasunogan makatukod og balik apan ubos sa kondisyon

Tugotan nga makabalik og tukod kadtong 228 ka pamilya kansang balay na-ugdaw sa sunog sa miaging adlaw sa Sityo Back Matimco, barangay Subangdaku, Mandaue City apan ubos sa kondisyon.

Gawas sa pagkaon ang mga nabiktima makadawat og financial aid gikan sa city hall.

Nasayran nga 176 ka mga struktura ang gilamoy sa kayo niadtong Lunes sa hapon, apan ang dapit nga nasunogan gikatahong privately owned ang luna hinungdan nga nitumaw ang kabalaka sa mga biktima nga hayan dili na sila pabalikon.

Ang hepe sa City Social Welfare and Services (CSWS) sa Mandaue Jessie Perez nagkanayon nga makabalik og tukod ang mga nasunogan apan gikinahanglan nga ipatuman ang re-blocking base sa gipahibawo sa barangay kapitan sa Subangdaku Ernie Manatad.

Kini nagpasabot nga sa dili pa motukod og straktura sa area kinahanglan nga adunay road network nga ka-agian og sakyanan ilabi na ang fire trucks ngadto na sa interior nga bahin, adunay tukma nga gilapdon sa metro kuwadrado nga luna nga maoy tarukan sa matag balay ug drainage plan.

Gipahibawo ni Perez nga sugod niadtong miaging gabii nakapang apod-apod na sila og pack meals ngadto sa 904 ka individual nga nagpasilong sa gipangta-od nga trapal o tent duol ra sab sa nahitabo-an.

“Ang city mohatag og full meals (pamahaw, pani-udto ug panihapon) good for three days lang,” tipik sa pamahayag ni Perez sa dihang nahinabi sa Superbalita Cebu.

Mohatag sab ang kagamahanan pinaagi sa buhatan sa CSWS og financial assistance diin ang household owner makadawat og P10,000 samtang ang sharer o renter ang mahatagan og tag-P5,000.

Giklaro ni Perez nga aron malikayan nga adunay mopahimulos sa higayon ang iyang buhatan mohatag og Disaster Assistance Family Access Cards (DAFAC) nga maoy mo-ila sa mga lehitimong fire victims.

Nasayran nga moabot sa 904 ka mga individuals ang apektado diin sa 228 ka pamilya, 176 niini nanag-iya og balay, 18 renters ug 34 ka sharers base sa nagpa-rehistro sa miaging gabii.

Samtang ang barangay Subangdaku mihangyo sa private sectors og donasyon sama sa used clothing, habol ug uban pa nga magamit sa mga nabiktima, sa kadtong mohatag og donasyon mamahimong ihatod sa buhatan sa CSWS o ilahos sa barangay hall sa Subangdaku.

Base sa imbestigasyon sa Mandaue City Fire Station nga ang kayo nagsugod sa panimalay ni Juana Racan ug base sa gibutyag ni Kapitan Manatad.

Apan si Racan sa iyang bahin miingon nga ang kayo nagsugod sa ikaduhang andana sa iyang balay ug nakita nga nagkayo-kayo ang wirings sa kuryente.

Gibana-bana nga moabot sa P1.5 milyon ang danyos sa maong katalagman.