Millionth babies magsaulog sa ilang birthday ugma
Ugmang adlawa, Huwebes, saulogon ang ikatulo ka tuig sa 100 ka mga symbolic babies kun 100 millionth babies sa nasod.
Duha sa mga bata nga anaa sa Sugbo, gisaulogan na sa ilang advance birthday sa Commission on Population (Popcom).
Niadtong Hulyo 27, 2014, gilusad sa Popcom ang 100 millionth babies, simbolo nga niabot na og 100 million ang populasyon sa Pilipinas.
Isip timaan, 100 ka mga masuso sa tibuok nasod ang gitawag nga symbolic babies sa Popcom, unom niini naggikan sa Central Visayas, duha sa Sugbo, duha sa Bohol, usa sa Siquijor ug usa sa Negros. Gipasabot ni Myrna Alaba, tigpamaba sa Popcom 7, nga importanteng rason niini kini aron pagsukod sa mga nabuhat na sa kagamhanan alang sa populasyon.
Ang mga bata ang magsimbolo kon maayong serbisyo ang nahatag sa publiko.
Ang mga bata gi-monitor sa Department of Health, Popcom ug life-time benificiaries sila sa Philhealth.
Ang duha ka mga bata nga anaa sa Sugbo mao sila si Paul James Gregory Yntig, taga lungsod sa Sogod, ug si Kyle Olendang sa lungsod sa Pinamungajan.
Gihatagan sila og cake ug gift certificate aron mapalit alang sa ilang bag-ong senina sapatos ug ubang pang gamit.
Alang sa inahan ni Kyle nga si Josephine Paran, nga gikalipay niya nga usa si Kyle sa nahimong symbolic babies. Gawas sa panglawas, siguruon usab sa ahensiya mao ang edukasyon unya sa mga bata.