Kasugiran sa GapnodDagsa

Usa ka dakong tanghaga dinhi sa sityo Gapnod-Dagsa ang mga panghitabo nga nakapanlimbawot sa mga balhibo sa mga lumolupyo. Kini kabahin sa mga patayng lawas nga anha idagsa sa baybayon sa Gapnod-Dagsa. Tulo na ka bulan nga dunay gidagsa nga mga patayng lawas sa babaye ning baybayon ug nahitabo kini sa adlawng Biyernes. Ug miabot nag trese ka buok ang gidaghanon. Naalarma na ang kapulisan sa lungsod. Gihatagan nilag gibug-aton ang pag-imbestigar sa mga panghitabo.

“Dili na gyud ni ordinaryo kining mga hitaboa, Kapitan Odoy,” matod ni PO3 Duhaylungsod nga nakighinabi sa kapitan sa balangay Tigibdiin ang sityo Gapnod-Dagsa mahisakop.

“Tinuod gyud na, Sir Tsip!” ni Kapitan Odoy.

“Ug ang gikahibudngan nako, kay dinhi nangamatay ang maong mga babaye. Pulos ra ba sila mga dalaga!” ni PO3 Duhaylungsod.

“Motuo ka bag tunglo, Sir Tsip?” matod ni Kapitan Odoy.

“Tunglo?” miiknat ang mga kilay ni PO3 Duhaylungsod. “May gitunglo dinhing dapita?”

Gisuginlan ni Kapitan Odoy ang pulis bahin sa tunglo. “Dugay na karon, dunay duha ka managhigugmaay nga nagsumpaay dinhi ning baybayon sa sityo Gapnod-Dagsa. Apan nagbudhi ang babaye kay nagpakasal sa laing lalake. Mihilak nga nagtiyabaw ang lalake nga nagpanawag sa ngalan sa babaye. Gitawag sab niya ang ngalan ni Satanas, daw nangayog pakitabang sa hari sa kangitngit. Ug ang lalake nga ginganlan og Leoncio nagpakamatay dinhi sa baybayon.

CARMELO D. LARIOSA

Panadtaran, San Fernando, Cebu Matag karon ug unya ang mga molupyo makabati og tiyabaw ug hilak sa lalake matag tikyop sa kilumkilom. Nasayod sila nga si Leoncio kadto, nga gibudhian sa iyang hinigugma nga si Adorada. Nagpadayon gyud ang daghong sa pagmahay ni Leoncio matag abot sa kilum- kilom. Maong nahimong mingaw ug hilan kining baybayona!” Miginhawag halawom si Kapitan Odoy, dayon mipuno, “Ug kutob sa maligo dinhing babaye, labi nag kini usa ka dalaga, malumos gyud.”

Nakapanglingo-lingo ang pulis sa iyang nabati gikan sa kapitan sa balangay. ‘Tunglo? Daw dili katuohan,’ ni PO3 Duhaylungsod sa hilom.

USA hapon may naligo sa baybayon. Dalagag ulitawo. Si Renato, apo sa igsuong lalake ni Leoncio, ug si Rosalina, apo ni Adorada. Managhigugmaay sila ug may mga panumpa. Ang ilang mga panumpa gisulat nila sa bunbon sa baybayon. Unya mihampak ang kusog nga balod ug napanas ang mga panumpa nga nasulat.

Mitindog si Renato ug miingon, “Rosalina, gakson ta ang mga balod!” Ug nagdungan sila pagdupa sa ilang mga bukton aron gakson ang mga balod. Nabati ang lanog nilang mga katawa nga puno sa pagmahal.

Ang panumpa nilang Renato ug Rosalina mihingkod ngadto sa katumanan kay gihiusa man silang duha sa kaminyuon. Duna nay balaanong sakramento nga nagtakgos sa ilang duha ka kasingkasing.

Paglabay sa daghang katuigan sukad sa kaminyuon ni Renato ug Rosalina, ang baybayon sa Gapnod-Dagsa wala na hidagsai og patayng lawas sa usa ka dalaga. Wala na say nataho nga babayeng nalumos sa dagat. Ang tunglo hingpit nang nahanaw sa katumanan sa mga panumpa nilang Renato ug Rosalina, kay way usa kanila nga nagbudhi sa ilang gipanumpaan.

Ug karon, ang mga molupyo wala nay madungog nga daghong ug tiyabaw ni Leoncio nga naghikog sa baybayon sa Gapnod-Dagsa sa dugay nang panahon.