ROSE MODUWA SA CAVALIERS
Mitando ang free agent nga si Derrick Rose sa usa ka tuig nga kontrata nga nagbalor og $2.1 million nga tanyag sa Cleveland Cavaliers, taho sa US media kagahapon.
Si Rose, kinsa maoy labing batan-ong magduduwa nga nahimong MVP sa National Basketball Association (NBA) dihang iyang nakuha ang pasidungog niadtong 2011, nakigtagbo sa kadagkuan sa Cavaliers kagahapon sa Ohio.
Sa taho sa Cleveland.com, gituki sa panaghugpong ang kabahin sa kampanya sa Cavaliers sa sunod season sa NBA diin posible na’ng mawala sa ilang kiliran si All-Star pointguard Kyrie Irving, kinsa mihangyo nga magpa- trade sa laing team.
Gikinahanglan sa Cavaliers ang sama og kapabilidad ni Rose hilabi na kay seryuso si Irving nga mobiya na sa anino sa sama niyang superstar nga si LeBron James.
Si Rose, 28, lig-on nga backup sa pointguard nga posisyon kon dili madayon pagbalhin si Irving unya puwede sab kining mahimong starter kon mawala si Irving.
Sa panagtambayayong nila ni James ug Irving, ang Cavaliers nakasulod sa finals sa miaging tulo ka seasons, napilde sila sa Golden State Warriors niadtong 2015, nakabira sa kampiyunato niadtong 2016, unya napukan na sab sa Warriors karong tuiga.
Si Rose nag- average og 18 puntos, 3.8 rebounds ug 4.4 assists sulod sa 64 ka mga duwa ubos sa kampo sa New York Knicks sa miaging season.
Sa iyang pagsulod sa NBA ubos sa kampo sa Chicago Bulls, si Rose usa na sa labing maayong pointguards sa liga apan ang iyang duwa gihasol sa sunodsunod nga pagkaangol sa iyang tuhod.
Kon himsog si Rose, dili ikalimod nga makaukbok siya og laing lig-ong haligi sa kampanya sa Cavaliers.