BLATCHE WA SA ‘FINAL 12’
Gianunsyo na ni Gilas Pilipinas coach Chot Reyes ang iyang Final 12 nga mokombati sa 2017 FIBA Asia Cup karong Agusto 8-20 sa Beirut, Lebanon.
Sama sa gilauman, wala nahilakip sa puwersa si naturalized player Andray Blatche, kinsa nipadayag nang daan nga dili kini moduwa gumikan kay nagduhaduha kini sa seguridad sa Lebanon.
Gikuha aron ihulip kang Blatche mao si Fil-German Christian Standhardinder, kinsa maayo og gipakita sa kampanya sa Gilas sa miaging Jones Cup.
Ang ubang mga nadala sa Final 12 mao sila si Carl Bryan Cruz, Matthew Wright, Jio Alalon, Roger Pogoy ug ang mga beterano nga sila si Calvin Abueva, Terrence Romeo, Jayson Castro, Gabe Norwood, Japeth Aguilar, Raymond Almazan ug June Mar Fajardo.
Si Blatche,kinsa dugay nang nagduwa sa Gilas, gilakip ni Reyes sa inisyal nga 24-man pool nga iyang gisumiter sa Fiba Asia dala ang panghinaot nga mausab ra ang hunahuna niini.
Apan hugot na ang desisyon ni Blatche hilabi na kay bag-o lang nanganak ang asawa niini sa Amerika.
Bisan wala si Blatche, ang Gilas aduna gihapoy igong puwersa.
Sila si Jalalon ug Cruz nakapakita og maayong duwa sa Jones Cup hinungdan nga nakadesisyon si Reyes nga ilakip ang duha sa Final 12.
Sila si Standhardinger ug Cruz parehong apil sa laing
line-up sa Gilas nga mokombati sa Southeast Asian Games nga ipahigayon sab sa sunod buwan sa Kuala Lumpur, Malaysia.
Ning puntoha, wala pa’y desisyon si Reyes kon iya bang hulipan sila si Standhardinger ug Cruz sa luna niini sa Gilas line-up alang sa SEA Games.
Si Blatche nipadayag sa iyang panghinaot nga makapakita og maayong performance ang Gilas sa Lebanon games.
Sa iyang post sa Instagram, nagkanayon si Blatche nga kanunay siyang mapasalamaton nga nakarepresentar sa Pilipinas sa nagkadaiyang international events.
Katapusan siyang nakaduwa sa Gilas SEABA Championship niadtong Mayo diin napangulohan niya ang dominasyon sa mga Pinoy ning maong torneyo.