Nahinayak, nasugamak

Padayong problema sa mga drayber sa sakyanan ubos sa transport network companies (TNCs), sama sa Uber ug Grab cars, tungod sa kabalaka sa pagkuha og pasahero basin kini ahente sa Land Transportation Franchising and Regulatory Board (LTFRB) ug dakpon. Daghang nadani sa pag-apil sa TNCs tungod sa nindot nga tanyag nga sistema nga naghatag og igong kasayon sa drayber o operator ug pasahero. Napamatud-an na kini sa mga dagkong dakbayan sa gawas sa nasod. Maayong alternatibong sakyanan hinungdan sa pagtaas sa demanda.

Dihang niabot kini sa Pilipinas, labi sa Sugbo, daghang naingganyo nga tag-iya og pribadong sakyanan sa pag-apil sa TNC aron mahimong sideline. Dunay nangutang og bag-ong sakyanan isip negosyo apan, parehong nasugamak human wala malimpiyo pag-ayo ang ilang pagsugod sa operasyon dinhi. Ang nakapaet kadtong dunay tulubagon nga bayranan sa sakyanan matag buwan. Nahimong biktima ang mga drayber .

Sa pikas bahin, ang mga buhatan sa TNCs dayag nga abli, may dagkong billboards ug station sa airport ug malls. Apan sa likod, ang mga drayber gihubaghubagan sa pagkuha og kustomer gamit sa ilang app tungod sa mga ahente sa LTFRB.

Sakto ang LTFRB sa ilang paghigpit ug pagkontrolar sa gidahanon' sa sakyanan sa kadalanan ug sa samang higayon, ang TNC dunay punto nga gibarogan sa ilang negosyo. Sakto nga may kontrol o limit labi na nga dili madominar sa pipila lang ka adunahang negosyante ang TNCs, aron dili nahisama sa taxi operations.

Dunay haw-ang sa polisiya ug paghubad sa balaud bahin sa TNCs, apan, ang drayber nga nagtinarong sa pagpanginabuhi dili mapiit. Awhag nato sa LTFRB isip ahensiya sa kagamhanan.

Ug dako kining hagit sa mga gagmay o kabus nga mag-organisar ug hiniusang mokuwestiyon sa ilang pamaagi human nasugamak sa dili paborableng kahimtang ug nahinayak na sa pagpangutang.