Kaisug ni Digong
Karon pa ko makakita og presidente sa Pilipinas nga sama kaisug ni Presidente Rodrigo Duterte.
Sa makadaghang higayon gitambagan si Digong sa iyang Presidential Security Group (PSG) nga dili moadto sa mga dapit nga dili luwas ang iyang seguridad apan dili siya mopatuo.
Bisan sa pagpugong sa iyang security mibiyahe siya sa nagkalainlaing dapit sa Mindanao panahon sa kagabhion.
Karong bag-o nahinayon gyud siya pagbisita sa mga sundawo sa Armed Forces of the Philippines (AFP) ug mga sakop sa Philippine National Police (PNP) nga nakig-away sa mga teroristang Maute ug Abu Sayyaf didto sa Marawi City.
Kuyaw kadtong iyang gihimo tungod kay dunay gubat didto og dunay daghang sniper nga muposil kaniya. Mahimo usab nga pabuthan og grenade launcher ug ubang matang sa high-powered firearms sa mga kaaway ang iyang nahimutangan.
Sumala sa presidente nga kinanghang moadto siya sa Marawi City samtang nakigubat pa ang atong mga sundawo ug kapolisan sa kaaway. Dili siya gustong mutambong kon mulampos na ang gobiyerno sa maong gubat.
Niadtong Lunes, human sa iyang State of the Nation Address (SONA) miguwa ang presidente aron atubangon ang mga raliyesta didto sa gawas sa Batasang Pambansa. Siguro akong nanindug ang balhibo sa mga sakop sa PSG tungod sa kakuyaw sa gihimo ni Pres. Duterte nga nakig-atubang sa mga walhong nag-rally. Dili sila makasiguro nga walay gidalang armas ang pipila kanila nga mahimong ilang ipusil-patay sa presidente.
Bisan kon modayeg kita sa kaisug nga gipakita sa presidente apan angay nga mahibaw-an sa tanan ang kagubot sa atong nasud kon mapatay siya.
Husto kining gihimo ni Pres. Duterte sa paghunong na sa peace negotiation tali sa Communit Party of the Philippines (CPP) – National Democratic Front of the Philippines (NDFP) – National People’s Army (NPA).
Samtang nanglingkud na ang mga dagko sa mga kumonista ug sa Pilipinas didto sa The Netherlands aron maghisgut na og kalinaw nagsige usab og ambush ang mga NPA dinhi sa atong mga sundawo ug kapulisan. Padayon gihapon ang ilang pagpangilkil sa mga residente sa kalungsuran.
Nakasabut kita sa tumong ug tuyo ni Pres. Duterte niining pagpangitag kalinaw uban sa mga kumonista apan sayud naman kita sa linugdangan niini.
Nagsalig ang mga kumonista kay mga ground troops lamang ang nakigubat kanila kaniadto. Kining gisaad sa presidente nga human sa gubat didto sa Marawi City isunod niya pagbomba ang mga kampo sa mga NPA mao nay makapakurog kanila. Dinhi na unya motahan ang mga kumonistang NPA.