Kita Kita nilahutay, nisugakod, nakigtigi
Taudtaud na gyud nga morag gimug-otan ko ni Lady Luck ug magnganga lang sa kaibog kon dunay raffle sa kalihukan nga tambongan.
Nausab kini niadtong Dominggo kay usa ko sa dako kaayog ngisi sa Rogin-E Man Hub 2017 sa SM City Cebu Northwing. Gadget ang akong nabitbit ug bale tulo ka bulan nga Rogin-E.
Si Roxanne Barcelo ang program host. Nipakita usab si fitness coach Jim Saret (sa The Biggest Loser) ug nikanta si Cebuana international diva Anna Fegi.
Dunay mga kalihukan nga pakusganay. Nisulay kog pusdak adtong dakong maso katulo pero wa gyud moabot sa punto nga mapasiga nako ang suga.
Nakadawat man kog Rogin-E, basin makusgan na ko sa sunod higayon. Hahaaa! Da haws is nat dahum!
○○○ Sa trailer pa lang, nakaingon ko nga nindot ang pelikulang "Kita Kita" nila ni Alessandra di Rossi ug Empoy Marquez. Tungod kay indie movie lagi, nahadlok ming taga E-Group nga hilig sa mga nindot nga pelikulang Tagalog nga di kini magdugay.
Tuod man, nindot ang pelikula. Nindot usab ang pagkaarte ni Alex ug Empoy. Adtong Miyerkules, gisalida pa kini bisan pa kon niabli ang Finally Found Someone ni Sarah Geronimo ug John Lloyd Cruz ug ang Atomic Blonde ni Charlize Theron.
Sa ikaduhang semana, gilinyahan pa gyud kini. Mga pahalipay! ○○○ Nakahisgot man tag indie movies, karong Agosto, saulogon ang usa ka film festival sa mga pelikulang hinimog Pinoy diin usa sa mga isalida mao ang Patay Na Si Hesus.
Sorpresa kay usa sa mga bida mao si Jacklyn Jose uban nila ni Melde "Joe" Montanez, Chai Fonacier, Vincent Viado ug uban pa. Si Jacklyn ang mama sa tulo ug si Hesus ang ilang amahan nga namatay.
Nagtubo ang mga anak nga wala ang ilang amahan. Sa pagkamatay niini, nibiyahe ang inahan ug mga anak ngadto sa Dumaguete.
Sa pagbiyahe nila magdagan ang istorya. Lingaw paminawon si Jacklyn nga mag-Binisaya apil na ang pamalikas.
Atong suportahan aron mas modaghan ang mohimog mga pelikulang Binisaya o Cebuano. Daghang indie nga Binisaya nga nasalida sa Manila pero wa makita dinhi sa Visayas mismo.
Si Victor Villanueva nga direktor sa My Paranormal Romance nga gisalida pila ka tuig kanhi, mao sab ang direktor sa Patay Na Si Hesus.