RUPINTA GIHANGOP:

Human nasuspenso og unom ka buwan, si Barangay Kapitan Felicisimo 'Emoc" Rupinta uban sa iyang pito ka mga konsehal nakabalik na sa serbisyo kagahapon. Gihangop sila sa ilang dumadapig diin gipahigayon ang misa ug boodle fight sa paniudto.

Unahon sa konseho sa Barangay Ermita, dakbayan sa Sugbo ang pagpalusot sa honorarium sa dul-an sa 200 ka mga kawani nga walay suhol sulod sa unom ka buwan.

Ikaduha prayoridad sa konseho mao ang subsob nga kampanya batok sa ilegal nga druga sa ilang barangay, diin

Kini ang gibutyag ni Kapitan Felicisimo “Imok” Rupinta ug pito ka mga konsehal kinsa pormal nang nibalik sa ilang panerbisyo kagahapon diin gisugat sila sama sa pista nga selebrasyon sulod sa sports complex.

Matod ni Rupinta nga posibleng molusot na ang honorarium sa kawani sa barangay karong Miyerkules ug karong adlawa, ila usab ipahigayon ang tigom sa Barangay Anti Drug Abuse Council (Badac) nga adunay 41 ka miyembro.

“Human sa unom ka buwan nagtiyabaw ang mga tawo kay wa may suweldo pero nanarbaho. Karon first thing I will do mga duha ka adlaw siguro molusot na ilang payroll aron makasweldo sila,” padayag ni Rupinta.

Dugang sa kapitan nga dihang wala pa sila masuspenso, hapit na mahurot ang namaligya og drugas apan karon, may 33 ka mga tawo ang tigpayuhot sa drugas.

“Pirmirong tawag hangyo na, ikaduhang tawag isog na ug ikatulong tawag basin og lain na,” matod ni Rupinta, kinsa niingon nga way nahimo ang mga sundalo batok sa druga sa Ermita.

Gitug-an sa kapitan nga sulod sa unom ka buwan, padayon ang ilang pagserbisyo sa barangay sa ilang personal nga kapasidad.

Matod niya nga kon wala pa sila, hayan maputlan sa kuryente ug tubig ang barangay diin siya nangutang sa ilang kooperatiba og kapin sa P400,000 para ibayad sa pito ka buwan nga bayranan.

Si Mayor Tomas Osmeña niingon nga iyang obserbahan ang Ermita nga karong nibalik na si Rupinta.