9 SAKOP SA SINDIKATO NASIKOP
GI-BUY BUST SUD SA HOTEL; MANG-HACK SAB OG CREDIT CARD
Siyam ka mga tawo nga gituohan nga miyembro sa usa ka dakong sindikato nadakpan sa gihimong anti
drug operation sa Fuente police station sa usa ka dakong hotel sa uptown area sa syudad sa Sugbo niadtong Dominggo sa gabii.
Duha ka bulto sa gituohang shabu ang nasakmit sa kapulisan nga motimbang og kapin sa 200 gramos ug gibana-bana nga mobalor og P2.9 million gawas sa mga gamit sa pagsuyop ug kwarta nga mosobra sa P50,000.
Matod ni Chief Insp. Maria Theresa Macatangay, hepe sa Fuente police station, nga nakadawat sila og tawag gikan sa management sa usa ka hotel nga nahimutang sa uptown area sa syudad sa Sugbo labot sa kadudahang mga tawo nga mi check in.
Usa sa mga room boy nitugsa kapulisan nga natingala siya nga sa iyang pagsulod sa lawak aron unta paglimpyo sa giabangan nga lawak sa mga suspek, gipangtabunan ang smoke detector.
Tungod niini, nagduda na silang Macatangay nga dunay illegal nga kalihukan ang mga naa sa sulod sa kwarto hinungdan nga ila unang gihimo ang buy bust operation ug dayong sulod.
Nisugat sa ilang panan-aw ang duha ka dagkong putos sa gituohang shabu ug usa ka laptop.
Ilang unang nasikop ang upat nga silang Chris Araneta 36, taga Ingles V. Rama, kanhi binilango sa New Bilibids ug niadto lang 2014 nakagawas sa prisohan; Crise Claire Ferolino, 24,taga V. Rama avenue; Alvin Navaja, 37, taga Salvador, Labangon; ug Mark Curayas, taga sitio Camagong, Lahug ning siyudad.
Sa imbestistigasyon, nasuta nga duna pa silay mga kauban nga maoy hinungdan nga nilusad sila og follow up operation nga niresulta usab sa pagkasikop ni alyas Mary Ann sa laing lawak sa hotel nga matod pa maoy tighatod sa drugas; Siegfred Mabitad, taga Punta Princesa apan nasikop sa usa ka hotel sa Capitol Site; alyas Marlyn nga kanhi nurse sa California U.S.A apan kasamtangang nag-abang sa usa ka condominium sa barangay Lahug; alyas Elizalde ug Chariez.
Gawas sa ilang kalambigitan sa illegal nga drugas, gituohan nga nang- hack sab sila sa mga ATM ug credit cards tungod sa nakuha nilang listahan nga dunay mga ngan sa mga langyaw diin nakabutang usab ang
pin number ug account number niini.
“Ang modus nila, they would enter into a hotel usually high end kay dili ka afford ang police pag stake out at the same time they transact also online thru cellular phones for delivering, murag pizza ba, mo- order ka pinaagi sa phone,” matod ni Macatangay.
Gituohan nga sakop sa usa ka dakong sindikato ang mga dinakpan sanglit mahalon nga kwarto ang ilang giabangan nga matod pa moabot og tag P10,000 ang matag adlaw ang bayad. Gikan gihapon sa Bilibid ang
supply sa illegal nga drugas nga gipaagi kang Chris Araneta nga kanhi usab binilanggo sa maong pasilidad.
Apan hugot ni niyang gihimakak nga ila ang nakuhang drugas ug kwarta apan wala na siya mohatag og dugang pamahayag.
“Dili na amoa, Sir. Nakuha rana sa koan, Sir, sa hotel. Dili na ko mo comment sir,” matod ni Araneta. /