UBER GIPATAWAG SA LTFRB

Tagbuon sa Land Transportation Franchising and Regulatory Board (LTFRB) ang kadagkoan sa Uber karong adlawa aron patubagon niining nasayran nga padayon nila og pagdawat og aplikasyon sa ilang transport network vehicle services (TNVS) bisan paman og gidid-an na sila sa ahensiya.

Matod ni LTFRB Chairman Martin Delgra III kinsa nibisita sa Sugbo kagahapon, nga niadtong Huwebes atol sa ikaduha nga pakigtagbo sa technical working group (TWG) ug sa transport network companies (TNCs) nipagawas og direktiba ang ahensiya nga hunongon ang pagdawat og aplikasyon subay sa paglimpyo usab sa wala’y dokumento nga driver o kolurom. Dugang ni Delgra nga giisyuhan nila og show cause order ang Uber alang sa usa ka hearing karong adlawa aron pangayoan og katin-awan nganong dili kanselahon ilang accreditation subay sa ilang paglapas nga gihimo. Hinuon, ang laing transport network nga Grab Philippines nituman sa kamanduan hinungdan nga ang Uber ra ilang gipatawag.

Gipasabot sa Chairman nga suportado sila sa maong klase sa transportasyon ug kinahanglan nila nga susihon pa ang TNVS tungod sa mga lapso nga nakita sa ahensiya.

Dugang ni Delgra sa tibuok nasod aduna’y kapin 3,000 ang TNVS nga aduna’y certificate of public conveyance (CPC) o provisional authorities (PAs), kapin 4,600 ang pending application, 2,400 ang para dismissal ug 2,440 ang pending sa reconsideration. Sa Sugbo, 815 pending application, 103 ang aduna’y PA apan 21 lang ang ni- renew sa kasamtangan. Mando si Delgra sa LTFRB 7 nga I-proseso na ang pending aron mahatagan na kini og PA.