Asia Brewery mihatag na sa ilang P300 mil nga donasyon sa Manipis Elementary School

Hingpit na nga nadawat ang P300,000 nga gisaad alang sa Manipis Elementary School, dakbayan sa Talisay.

Kini human sa nahitabong kontrobersiya nga naglambigit sa organizers sa 70.3 Cobra Ironman nga ipahigayon karong Dominggo dinhi sa Sugbo.

Ang Asia Brewery Company maoy pormal nga midunol niini.

Kon kahinumdoman, nahimong kontrobersiyal ang maong donation human gipasanginlan ang organizer sa Ironman nga maoy misaad niini niadtong 2015 apan wala matuman.

Si Alvin Santillana, pangulo sa Disaster Risk Reduction Management Council sa Talisay City, mipasangil sa Sunrise Event, organizer sa Ironman, nga misaad sa maong donation.

Mihulga si Santilla nga bakwion ang permit sa Ironman ug dili na makaagi sa Talisay ang mga partisipante niini sanglit wala kini motuman sa ialng saad.

Kini nakahatag og kabalaka sa Sunrise Event kinsa mitumbok nga dili sila ang misaad niini kon dili ang Asia Brewery nga maoy ilang title sponsor.

Kagahapon sa buntag, si Geeroh Aldeck Ebrada, Assistant Brand manager sa Asia Brewery maoy midunot sa tseke ug mipasabot nga nadugay ug niabot gyud og duha ka tuig una natunol ang ilang tabang tungod usab sa kalangan sa tunghaan pagduso sa ilang mga gikinahanglan.

Gani duha raman ka requirements ang ilang gikinahanglan, ang official receipt sa Talisay Division ug Certificate of Registration sa Manipis Elementary School.

Matod ni Ebrada nga gani ang maong tseke andam naman niadto pang Abril 29, 2017.

Si Zenaida Silva, principal sa Manipis Elementary School miingon nga adunay miscommunication nga nahitabo.

“Ang akong gi- contact wala na nagtrabaho didto sa office,” matod ni Silva.

Hinuon bisan pa niini ilang gipasalamatan ang Asia Brewery sa maong donasyon nga dako na kayo kining tabang sa ila unyang paliton nga audio visual facilities.