Bag-ong building sa LTFRB matukod na karong t uiga

Usa sa tumong sa pagbisita ni Land Transportation Franchising and Regulatory Board (LTFRB) Chairman Martin Delgra III sa Sugbo kagahapon mao ang pagsiguro nga matukod na karong tuiga ang ilang bag-o nga buhatan dinhi sa Rehiyon 7.

Matod ni Delgra nga aduna’y P160 milyones nga budget ang regional office aron pagtukod sa bag-ong buhatan diin P90 milyones niini ang pagpabarog sa edipisyo ug P70 milyones alang sa pagbayad sa luna nga pagatukoran niini.

Iyang gibutyag sa mga tigbalita kagahapon nga aduna’y tulo ka mga dapit ang ilang gitan-aw nga pagatukoran.

Lakip niini ang Labangon ug Day-as sa dakbayan sa Sugbo o sa dakbayan sa Mandaue.

Dugang ni Delgra nga kinahanglan nga masugdan na pagtukod ang building karong tuiga aron dili mabalik sa panudlanan sa national ang budget niini.

Aduna’y tulo ka andana ang maong building.

Gitug-an hinuon niini nga nagpabilin nga hagit sa ilang mga buhatan kining impounding area diin wala usab siya mobutyag kon mabutangan ba ang maong bag-ong buhatan.

Kasamtangan nga anaa sa North Reclamation Area (NRA) ang buhatan ron sa LTFRB 7.