I’ve grown enough
Sa laing lamesa ko molingkod pagkahuman kog order sa akong pagkaon ug drinks sa counter. Gituyo ko nga sa duol ko molingkod sa nahimutangan nila ni Ate Renren ug Jonar. Gusto kong madungog ang ilang giestoryahan.
Apan mitindog na si Jonar. Miuna siyag gawas sa canteen. Mitindog si Ate Renren ug miduol nako. Milingkod siya sa akong atbang. “Kaila diay mo si Jonar, Te?” Miinom ko sa akong softdrinks.
“Karon pa lang gyud. Wa ko magdahom nga magkadungan mig kaon sa usa ka table ron. Siya diay si Jonar nga secret
love nimo, MayAnn?” Mitando ko. “Guwapo, Te, no?” Dako kaayo kog pahiyom. Mapagarbuhon kong midayeg kang Jonar.
“Well, guwapo tuod siya. Ug husto ka, macho sab siya.”
“Wa gyud ko masayop sa pagmahal niya, Te, no?”
“Batan-on ka pa man gud, MayAnn. Di pa sab nato maseguro kon love ba gyud nang imong gibati niya. Naa man guy panghitabo sa atong feeling ngadto sa opposite sex nga gituhoan nato nga usa na ka love. But usa lang diay ka pag- admire.”
Mihunong kog kaon. Miinom ko sa tubig sa akong baso.
“Naa ka na sab ana, Te. Tinuod lagi nga love gyud ning akong gibati kang Jonar. Di ni usa ka pa- admire, uy. Labaw na nga di usa ka puppy love.”
“May right kong manghilabot anang imong feeling, MayAnn, kay maguwang ko nimo. Sa imong edad ron, di ka pa angay mosu’od anang gugma-gugma. Basig mapasagdan nimo ang imong studies.”
“Di ko man sab pasagdan ang akong pag-eskuwela, Te, kon magkauyab na mi si Jonar.”
“Pero nangulitawo ba siya nimo, MayAnn?”
Wa ko makatingog. Mora kog natuk-an sa pangutana ni Ate Renren. Unsaon ko man tuod pagkahimong
girlfriend ni Jonar nga wa man ko niya pangulitawhi? Mora man gani siyag naglikay nako?
“Moabot ra ang panahon, Te, nga pangulitawhan ko ni Jonar. Makahimo kaha siya sa pag- ignore sa akong beauty?”
Mikatawa ko. Tinuod man sab nga guwapa ko. Parehas mi si Ate Renren, attractive sa mga boys.
Wa na motingog si Ate. Nananghid siya nako nga mouna sa paggawas sa canteen. Nasabtan tingali niya nga di gyud ko niya kapugngan sa akong love kang Jonar. (SUMPAYAN)