Panukiduki gitumong matubag ang kakabus sa Sugbo, Indonesia
Nakigtambayayong ang mga magtutudlo sa University of San Carlos (USC) Department of Economics sa langyaw nga mga tulunghaan sa pagdukiduki alang sa kahupayan sa kakabus, samtang giduso ang mga pagtuon sa nagkadaiyang isyu sa katilingban.
Gisugdan nila propesor Francisco Largo, Krizia Garcia, Christopher Bacungan, ug Julian Thomas Alvarez ang pagtuon uban nila ni Dr. Yulia Indrawati sa Universitas Jember ug Dr. Ika Rahutami sa Unika Soegijapranata Catholic University.
Tuyo ug tumong sa pakigalayon, nga ipahigayon hangtod pa sa sunod tuig, nga tunan ug itandi ang nagkalainlaing talaan sa kakabus sa dakbayan sa Sugbo dinhi sa Pilipinas, ug ingon man sa mga dakbayan sa Jember ug dakbayan sa Semarang sa Indonesia.
Makahatag unya kini og mga kasayuran nga maoy mamahimong tamdanan ka- bahin sa kakabus sa tulo ka mga dakbayan. Katuyuan niini nga maabagan ang mga dakbayan mga mapangitaan og tukmang kasulbaran ang kakabus.
Samtang, gipa-ambit sa mga magtutudlo sa USC School of Business and Economics ang mga nagkadaiyang pagtuon atol sa Scientific Conference nga gipasiugda sa Philippine Population Association sa Silliman University, ug sa lain sa'ng panagtigom uban sa mga langyaw sa USC Talamban campus.
Lakip niini ang pagtuon ni Bacungan bahin sa "The Effects of Different Economic and Institutional Factors on Average Internet Speed: Cross Country Study from 2008-2014.”
Gipaambit sab ni Prof. Alan Tabanao ang kabahin sa "Households' Willingness to Pay for an Improved Garbage Collection in Barangay Labangon, Cebu City."
Katuyuan sa mga propesor nga maabagan ang mga magbubuhat og mga polisiya nga masulbad ang mga isyu nga may labot sa teknolohiya, kahimsug ug paglabay sa mga basura.
Gidasig sa USC ang mga magtutudlo niini nga mopahigayon og mga pagtuon, ug makig-alayon sa mga kasanggang tulunghaan sa pagpahigayon og mga panagdukiduki aron sab mapalig-on ang international research network niini. Giawhag sab sila sa unibersidad nga ipa-ambit ang ilang mga gipamuhat sa mga international conference, ug ipapatik sa mga basahon sa mga industriya.