KOMPLETO NA SILA
Sa labing unang higayon, nakompleto na ang puwersa sa Gilas Pilipinas nga mokombati sa FIBA Asia Cup sa pagbutho ni Calvin Abueva sa ikalimang praktis sa national squad sa miaging gabii.
Human wala mibutho sa nag-unang upat ka mga praktis sa Gilas, si Abueva mitunga sa labing unang higayon usa ka adlaw human mihatag og
ultimatum si national coach Chot Reyes nga tangtangon siya sa Final 12 kon dili gihapon kini motunga.
Ang FIBA Asia Cup ipahigayon karong Agusto 8-20 sa Beirut, Lebanon.
Bisan mibunok ang uwan, si Philippine Basketball Association (PBA) Commissioner Chito Narvasa mitunga sa praktis sa Gilas sa Meralco gym aron mosusi sa preparasyon sa team.
Gawas kang Abueva, ang ubang mga sakop sa Final 12 mao sila si June Mar Fajardo, Gabe Norwood, Jayson Castro, Fil-German Christian Standhardinger, Terrence Romeo, Roger Pogoy, Raymond
Almazan, Matthew Wright, Carl Bryan Cruz, Japeth Aguilar, ug Jio Jalalon.
Bisan kuwang sa preparasyon ang Gilas, nagkanayon si Reyes nga dili gihapon kini bastabasta malupig batok sa bisan unsang team sa torneyo.
“We’re going to face another huge task, we have 10 days to go before facing the best teams in Asia. We’ve hardly had any complete practice yet, but like I said, regardless of all our problems, no one is going to outfight us,” matod ni Reyes sa interbyu sa Spin.ph.
Si Wright, kinsa maoy bag-ong tirador sa gawas sa Gilas, miangkon nga dili pa andam ang Gilas apan buhaton nila ang tanan nilang makaya. “We’re nowhere near our full potential,” matod ni Wright.
Ang Gilas kinahanglan pa sab mo-adjust nga wala si natuaralized center Andray Blatche, kinsa nakadesisyon nga dili moduwa ning higayuna gumikan kay aduna kini kabalaka kabahin sa seguridad sa Lebanon.