PRAYORIDAD ANG GOLD
Aduna pa’y pipila ka mga adlaw sa dili pa motiklop ang iyang hugot nga pagbansaybansay sa gawas sa nasod apan gipadayag ni Cebuana marathoner Mary Joy Tabal nga hapit na niya maabot ang hingpit nga kaandam alang sa iyang kampanya sa umaabot nga 29th Southeast Asian (Sea) Games sa Kuala, Lumpur Malaysia.
“My mindset for now is to finish all my remaining long and hard training. I’m almost good to now,” matod ni Tabal sa interbyu sa Sun.Star Cebu, igsuong buhatan ning mantalaan.
Matod sa lumad nga taga Brgy. Guba, Cebu City nga mahuman ang iyang pagbansaybansay sa Tuscany Training Camp sa Italy karong semanaha.
Nagkanayon si Tabal nga ang iyang tulo ka mga semana nga pagbansaybansay sa bukid sa St. Moritz sa Switzerland mao ang labing lisod nga iyang nasinati sa iyang training sa gawas sa nasod. Nagkanayon ang kanhi
sprinter sa Southwestern University ( SWU) nga dako ang kalambuan sa iyang abilidad gumikan sa iyang training sa bukid. “This week is the last of my long and hard training. I’m going to finish strong,” batbat sa 2015 Sea Games silver
medalist ug bugtong babayeng marathoner sa Pilipinas nga naka-qualify sa Olympics.
Si Tabal, kinsa sakop sa Motor Ace Kawasaki Racing Team, mobalik sa Pilipinas karong Agusto 9 ug molarga kini paingon sa Malaysia karong Agusto 16.
Ang marathon event ipahigayon karong Agusto 19 pipila ka mga oras sa dili pa ang pormal nga pagsugod sa matag duha ka mga tuig nga kompetisyon.
Nagkanayon si Tabal nga iyang prayoridad ang pagdaog og gold medal sa kompetisyon ug ikaduha na lang ang pagtali og maayong oras.
“The time will depend on the pacing during the race. I also want to have a good finish time, but in competition like Sea Games, the medal and ranking is always the priority,” pasabot ni Tabal. Ang marathon usa lang sa sporting events nga sugdan ang kombati sa dili pa ang opening program. Ang uban mao ang archery, sepak takraw ug aquatics. /