Piniriso sa city jail ‘gi-raid’ sa pulis sa iyang selda

Drug personality nga nabilanggo sa Cebu City Jail gikalitan og susi sa Cebu City Police Office human gitumbok sa nangasikop nga mga drug dealer sa syudad sa Sugbo nga maoy ilang kuhaanan sa illegal nga drugas.

Tungod niini, nalangay og kapin sa tulo ka oras ang pagbisita sa mga tawo nga gustong moduaw sa ilang mga kabanay sud sa bilangoan nunot sa kinalit nga inspeksyon sa CCPO nga gipangulohan ni Sr. Supt. Joel Doria.

Nagdala ang CCPO og Special Weapons and Tactics personnel ug mga sakop sa City Public Safety Company aron moabag sa pagsusi sa kubol ni Archie Abellana nga taga barangay Pasil.

Sa wala pa sugdi ang inspeksyon, gipasidan-an ni Doria ang mga sakop sa media nga mag-amping tungod kay dunay mga binilanggo nga positibo sa human immunodeficiency virus (HIV) nga makatakod.

Matod ni Doria nga ilang susihon unsa ka tinuod ang pangangkon sa ubang drug personalities nga ilang nangadakpan nga si Abellana maoy mokontak sa New Bilibid Prison alang sa supply sa illegal nga drugas.

Gihimo dayon ang pagsiksik sa kubol ni Abellana ug ilang nakuha ang mga drug paraphernalia sama sa gagmayng plastic packs nga dunay puti nga butang sa sulod, lighter, gagmay nga botelya nga dunay sulod nga liquid ug usa ka cellphone nga naboak na ang LCD niini.

Gitug-an ni Doria nga ilang ipaubos sa forensic examination ang cellphone niini aron masuta kon tinuod ang pasangil sa mga nalambigit sa illegal nga drugas nga siya ang tulay sa illegal drug trade sa sulod sa bilangoan ug sa gawas.

Si Archie, matod pa, ang nag supply sa illegal nga drugas nilang Mark ug Mercy Abellana nga nasikop sa anti drug operation sa CCPO nga nakuhaan og 10 kilos sa gituohang shabu.

“Kung maalala mo yung 10 kilos na nahuli kina Mark at Mercy Abellana, si Archie din contact nila. CIB at DEU nag operate din,” matod ni Doria.

Gihimakak ni Archie nga nalambigit pa siya sa illegal nga drugas samtang naa na siya sa sulod sa bilangoan.

“Wala nako ana oy. Kon sa Bilibid pa ko connected, bigtime na unta ko karon,” matod ni Abellana.

Human siya makuhai og mga ebedensya, ang jail warden sa City Jail Supt. Arnel Peralta, nisuspenso sa dalaw ni Abellana isip kabahin sa iyang silot sulod sa bilangoan.

Ibalhin siya og laing brigada samtang laing kaso ang giandam nga ilang ipasaka batok niini.

Bisan sa kahugot sa siguridad nga gipatuman sa mga jail officer, makasulod pa gihapon ang mga pinakete sa illegal nga drugas sa maong bilangoan. /