10 ka mga jailguard sa CPDRC parelibuhan kay hayan kunsabo

Di mominos 10 ka jail guards sa Cebu Provincial Detention and Rehabilitation Center (CPDRC) ang parelibohan sa ilang pwesto human sa nahitabong greyhound operation niadtong Martes diin P236,000 nga balor sa shabu ug ubang kontrabando ang nasakmit sa kapulisan ug Philippine Drug Enforcement Agency (PDEA).

Si Roberto “Bobby” Legaspi, officer-in-charge sa CPDRC, nibutyag kini ang ilang rekomendasyon sa CPDRC Task Force ngadto kang Gob. Hilario Davide III.

Sa kasamtangan, ang maong jail guards nga pulos mga regular nga empleyado sa Kapitolyo gipalayo una sa mga bilanggo ug gidestino isip tigbantay sa mga tower sa prisohan samtang gisusi pa ang posible nilang kalambigitan sa illegal drug trade sud sa prisohan.

Kon mamatud-an nga sila nitabang sa mga priso nga makalusot ang shabu sud sa prisohan, sila taktakon sa trabaho, matod ni Legaspi.

Si Bise Gobernador Agnes Magpale nagduda nga sobra pa sa 10 ka jail guards ang kakonsabo sa mga bilanggo sa pagpalusot og gidili nga druga ug ubang kontrabando.

Siya nagduda usab nga duna pay daghang shabu ang gitagoan sa canteen sa CPDRC diin nadiskobrihan ang shabu nga gitagoan sa usa ka tray sa itlog.

“Ang kanang nakit-an nila karon sa canteen murag wala pa na nila makuha tanan,” pahayag ni Magpale.

Ang mga miyembro sa CPDRC Task Force nagtigom sa Kapitolyo kagahapon ug nakakab-ot og pipila ka mga rekomendasyon nga iduso ngadto sa gobernador alang sa pagtugot.

Apil sa ilang rekomendasyon nga permanente na nga sirad-an ang canteen sa prisohan sa pagduda nga gigamit lang kini isip front aron tagoan ang gidili nga drugas.

Sa higayon marelibohan na ang 10 ka jail guards, matod ni Legaspi, mohangyo sila sa Cebu Provincial Police Office nga magpadestino og dugang mga pulis sa provincial jail.