2 KA RICO'S LECHON GIPASIRHAN
Giisyu na sa kagamhanan sa dakbayan sa Sugbo ang pagpasira sa duha ka mga sanga sa Rico’s Lechon human nasayran nga wa kiniy business permit.
Inubanan sa Prevention Restoration Order and Beautification Enhancement (PROBE), kapulisan, representante ni Mayor Tomas Osmeña ug abogado sa syudad, gibutang sa grupo ang tarpaulin diin aduna kini’y notice sa closure order.
Naabtan pa sa mga tigbalita ang mga kustomer nga gusto unta mokaon, apan sira na kini sa wa pa makabutang ang kagamhanan sa notisya.
Lakip sa gisirhan kagahapon mao ang Rico’s Lechon sa dan F. Cabahug sa Barangay Kasambagan nga gipanag-iya mismo ni Enrico Dionson ug ang Axis Entertainment Ave., nga branch niini sa dan N. Escario, Brgy. Camputhaw diin gipanag-iya kini sa usa ka Melanie Oyas.
Gisuwayan ning matalaan sa pagkuha sa habig ni Dionson, apan pagkutlo ning balita wa pa siya motubag sa tawag.
Base sa closure order sa mayor diin nadawat sa tagsa-tagsa ka branch niadtong Miyerkules, nahatagan pa og kahigayunan ang maong mga branch nga mo-comply sa ku- wang niini niadtong Hunyo 1 ug Hulyo 13 apan wala gihapon kini nasulbad.
Hinungdan nga nipadala ang buhatan sa mayor og show cause order niadtong Hulyo 21 aron mangayog katin-awan.
Matod ni Osmeña nga bisan kaalyado pa niya ug nakalapas kini, iyahang ipasira ang negosyo.
Dugang sa mayor nga kapin sa libo nga mga negosyo ang way business permit sa Sugbo ang iyahang ipasira. “Basta naa’y violation I would pursue.”
Usa sa pasirhan ni Osmeña kining commissary sa Rico’s tungod kay nakalapas usab kini sa balaod. /