Mga brgy. tanod ipa-ebalwar sa Cadac

Usa sa unang direktiba ni Cebu City Mayor Tomas Osmeña sa pangu sa karon nga gi-convene na nga Cebu City Anti-Drug Abuse Council (CADAC) mao ang paghatag og grado sa performance sa mga barangay tanod.

Kini aron masuta kon angay bang hatagan sa Siyudad og allowance ang mga tanod.

Ang pangu sa Cebu City Office for Substance Abuse Prevention (COSAP) Garry Lao mao ang gitudlo ni Osmeña nga maong mangulo sa CADAC.

Matod sa mayor nga kon adunay problema nga motumaw, kahibawo siya kon kinsay paninglan niya ug kini si Lao.

Nasayran nga ang unang assignment nga gihatag ni Osmeña ni Lao mao kini ang pag- assess sa mga tanod kabahin sa ilang anti-drug activities.

Pinaagi sa ratings, kini mao’y kuhaan og basehan sa mayor kon kinsa kadtong mga barangay tanod ang di na hatagan og allowance sa Siyudad.

Gihatagan usab og kagawasan ni Osmeña ang CADAC nga maoy mo-organize kon kanus-a sila magsugod niiing pag-monitor sa mga barangay tanod.

Duna pay laing mga direktiba nga gihatag ang mayor sa Cadac, apan kini nipasabot nga ang pagmonitor sa mga barangay tanod labing importante karon.

Si Lao, sa iyang bahin, niingon nga nakuha na nila ang plans and program sa 80 ka mga BADAC sa Siyudad diin matag buwan kini sila mosumetir sa ilang monthly report ngadto sa Department of Interior and Local Government (DILG).

Nunot niini, mosusi ang Cadac kon ang plans and program sa peace and order napatuman ba o wa.

Giangkon ni Lao nga bisan og wala pa na-convene ang Cadac, nabantayan na nila nga dunay mga barangay nga wa mo-implementar.

“We will pressure the barangay to implement their plans and programs nga ilahang gibutang sa barangay anti drug abuse council nga ilang gisubmit didto sa DILG.”