Kiha batok sa 4 ka pulis sa Talisay panghasi: opisyal

Kompyansa ang upat ka mga pulis sa Talisay Police Station nga mabasura ug makalingkawas ra sila sa kaso nga gipasaka ngadto sa Office of the Ombudsman Visayas tungod sa giingong pagbutang og ebedensiya.

Matod sa mga pulis nga usa ka matang sa pagpangharas ang gihimo sa dinakpan.

Ang upat ka mga pulis giila nga sila si SP01 Oliver Ortega, PO3 Andriano Bacatan, PO1 Genesis Cabatas ug PO1 Euwen Pitogo.

Si Robert Fernan, kinsa gidudahan nga maoy nangrakrak sa Talisay City Jail niadtong Hunyo 26, nasikop niadtong Hulyo 7 sa kaadlawon atol sa buy busy operation sa kapulisan mismo sa iyang balay sa barangay Maghaway.

Iyang gikiha ang mga pulis nga ningsikop kaniya.

Apan pinaagi sa iyang abogado nga si Salvador Solima, nisang-at kini og kasong grave misconduct, grave abuse of discretion, dishonesty, oppression ug conduct unbecoming of police officers, batok sa upat ka mga pulis sa Talisay ngadoto sa Ombudsman.

Tungod sa pasangil, gibutangan siyag ebedensiya sama sa shabu ug armas ug gikuha pa ang iyang kuwarta nga P200,000.

Si Sr. Insp. Albert Quilotorio, deputy chief sa Talisay City Police Station, niingon nga katungod sa dinakpan nga mopasaka og kaso batok kanila apan iyang gipasabot nga pagpangharas ang gihimo niini sa ilang mga sakop.

PROSESO GISUBAY

Matod ni Quilitorio nga nasubay sa proseso ang ilang gihimong operation ug na-record usab ang mga ebedensiya nga ilang nakuha gikan sa suspek sama sa KG-9 submachine pistol, mga bala sa 9MM ug dose ka pakite nga ang sulod gituohang shabu.

Base sa ilang gihimong background check, naila kini nga drug pusher ingon man hitman si Fernan sa drug personality sa lugar nga si Konsehal Felix Abacajan, kinsa naengkwentro sa mga sakop sa Provincial Intelligence Branch (PIB) niadtong milabay nga tuig.

Wa isalikway sa kapulisan nga nasuko ang mga nagpaluyo ni Fernan human nga wa sila mosanong sa hangyo nga di lang pagpamaligyag shabu ang ipasaka aron makapyansa.

“Nahibulong mi ani niya unsa gyud ni siya kay daghan man nanawagan namo, nangabugar para niya nga dili lang pabug-atan ang kaso aron makapyansa,”matod ni Quilitorio.

Gani andam kining mohatag og P500,000 aron lang di mapasaka ang kasong pagpamaligyag shabu.

Niadtong Enero 4 ning tuiga, nitahan na kini sa kapulisan sa iyang armas nga pugakhang.

Sa ilang himuong imbestigasyon, kanunay molutaw ang ngan nga maoy namaligyag shabu sa ilang lugar.

Sa pagkakaron, nagpaabot ang kapulisan ug kadagkuan sa Talisay City Jail sa resulta sa ballistic result sa mga kabhang nga nakuha sa Talisay City Jail kon mag- match ba kini sa KG-9 nga armas nga nakuha gikan ni Fernan sanglit milutaw usab ang iyang ngan nga siya maoy nirakrak sa maong bilanggoan niadtong Hunyo 26 ning tuiga. /