Magpale nagduda sa katuyoan sa bag-ong mobile app nga Pangga

Nagduda si Bise Gobernador Agnes Magpale sa tinuoray nga katuyoan sa usa ka bagong mobile application nga magtugot sa kliyente nga mangabang og babaye o lalake aron dunay makauban sa mga okasyon nga tambungan o lugar nga suroyon.

Ang bag-ong app nga gi-develop sa grupo sa mga Pinoy, gitawag og Pangga.

Kini nagtanyag sa mga kliyente nga moabang og “companions-for-hire” aron magsilbi nila nga hinigugma o kuyog sa mga kalihokan nga tambungan.

Sa site sa Pangga, duna kini lainlaing kategorya nga naglakip sa social media boyfriend o girlfriend nga magsilbi nga hinigugma sa kliyente sa Facebook.

Laing kategorya mao ang “Rent a Date” diin ang mahire nga babaye o lalake magsilbi nga hinigugma sa mga social event.

Ang ma-hire nga kuyog mahimo usab isip fitness buddy, tour guide o andam maminaw sa problema sa kliyente.

Ang mga developer sa app niklaro nga dili escort service ang ilang gitanyag sanglit dunay limitasyon ang kliyente sa abangan nga babaye o lalake sama sa gidili ang paghawok, pag-agbay, pakighilawas ug ubang mga aksyon nga dili na maayo.

Apan, mahimo sila momasahe sa kamot, magduwa og baraha ug ubang duwa, motan-aw og sine, mag-selfie o mogunit sa kamot apan ubos sa espesyal nga sirkumstansya.

Apan si Magpale nagduda sa nagpahipi nga katuyoan sa maong app bisan kon tua pa kini sa Manila nagbase kay posible kini mosangko sa prostitusyon.

“Posible nga nia na sa Cebu,” dugang sa bise gobernador, co-chair sa Provincial Women’s Commission.

Bisan ang Kagamhanan sa Siyudad sa Sugbo interesado nga mosusi sa mao nga app tungod sa kabalaka nga gamiton kini sa ilegal nga paagi.

Niklaro nang daan ang mga app developer nga di front sa prostitusyon ang ilang applicatio.