LAAG TA SA GARBO SA COMPOSTELA
Kun maghisgot na gani kita og suroy, masud dayon sa atong huna-huna ang budget, lugar nga makalingaw ug gamay ra ang magasto.
Ilakip gilayon sa imong listahan, ang resort nga gitawag og Gatubod Spring nga anaa mahimutang sa Brgy. Basak, lungsod sa Compostela, lalawigan sa Sugbo.
Gitawag siya og Gatubod kay ang tubig sa swimming pool nagagikan man sa tinubdan sa tubig nga iya sa kinaiyahan.
Ang resort gilibutan sa mga kakahoyan diin naghatag og kapresko ug kabugnaw sa palibot sa resort.
Ang Gatubod adunay duha ka dagku nga pool, ang usa niini adunay tag-as nga slides, kapin sa 40 metros ang gitas-on ug segurado ka nga malingaw. Adunay gitagana nga laing
pool alang sa mga bata. Ang entrance alang sa mga dagku tag P60 ug P30 alang sa mga bata ug libre sa entrance ang mga bata nga nag-edad og singko anyos paubos, way problema sa magda og sakyanan kay adunay daku nga parking area.
Aduna silay 24 ka mga open cottages diin P500 ang abang niini.
Ang resort kapin sa 20 ka kilometros ang gilay-on gikan sa siyudad sa Sugbo, mosakay ka lang og PUJ o mini bus paingon sa Compostela sa P25 nga plite, pag-abot sa merkado manaug ug magpahatud sa habal-habal ug adunay plite nga P25.
Matud pa ni Compostela Mayor Joel Quino, usa kini sa naghatag og garbo sa iyang lungsod tungod sa mga bisita nga maligo sa resort.
Nakatabang usab kini sa panginabuhian sa mga tawo nagpuyo sa barangay. /