Gawasnon na ang taga Ozamis?
Adunay panultihon sa Eninglis nga; ‘Live by the sword, die by the sword’. (What goes around comes around). If you use violent, forceful or underhanded methods against other people, you can expect those same methods to be used against you’.
‘Kon nabuhi ka sa espada, sa espada usab ka mamatay.’ Mao kini ang nahitabo sa mga Parojinog didto sa dakbayan sa Ozamis kinsa maoy nagkontrolar sa pulitika sa maong dakbayan sulod sa pipila ka dekada. Gikahadlukan ug gika-intapan si Mayor Reynaldo ‘Aldong’ Parojinog gumikan sa iyang grupong Kuratong Baleleng. Siya maoy ‘boss of all bosses’ sa maong gikahadlukan nga crime syndicate.
Walay gustong mosungag o mo-kontra sa maong grupo gumikan kay mahimamat gyud nimo ang sayo nimong kamatayon. Ang Kuratong Baleleng gikahadlukan gumikan kay usa kini ka sindikato nga nahilambigit sa pagpamatay, pagpanulis, kidnapping ug illegal drug trade. Ang mga sakop niini walay kukahadlok nga mopatay sa mga tawo nga mokuros sa ilang dalan.
Karon medyo nahuwasan na ang taga Ozamis City gumikan kay wala na ang pamilya nga ilang gikahadlukan. Para nila morag gawasnon na sila gikan sa ‘terror’ gumikan kay patay na ang lider.
Hinuon, aduna poy naguol nga mga tawo nunot sa kamatayon ni Mayor Parojinog gumikan kay aduna man usab silay mga loyal nga supporters nga naka-uyon sa ilang ‘maayo kunuhay nga batasan’. Ug kining maong mga tawo nakabenipisyo sa ilang mga binuhatan.
Kay kining mga tawo nga nahilambigit sa mga illegal nga kalihukan sama aning mga drug lords manggihatagon man kini sila sa mga tawo, labi pa sa ilang mga silingan kay aron usab sila ma-protektahan batok sa mga awtoridad. Basaha ninyo ang mga kaagi sa mga drug lords sama ni Pablo Escobar sa Colombia ug si Jeffrey ‘Jaguar’ Diaz dinhi sa ato di ba ‘manggihatagon’ sila.
(bobbygnalzaro@gmail. com)