Mga kamot nga nagkadugo

Ang pamilyang Parojinog sa Ozamis City nailhan nga maoy nagtukod sa anti-communist organization Kuratong Baleleng niadtong dekada 80. Human nilampos ang grupo sa pagpuhag sa mga Sparrow Unit sa mga rebeldeng komunista, sila gilambigit na sa mga pagpanulis, pagpangilkil ug uban pa.

Paglabay sa katuigan, ningsulod sa pulitika sa siyudad ang mga Parojinog nga sayon rang nidaug.

Ilang gihuptan ang pulitika sa Ozamis sud na sa sobra sa usa ka dekada. Bisan naa na sila sa lokal nga kagamhanan, wa mahunong ang mga hungihong sa ilang pagkalambigit sa mga krimen, apil na ang illegal drugs.

Sayo ning semanaha, gironda ang mga Parojinog ug daghan ang nangamatay.

Dinhi sa Sugbo, daghan sa lokal nga mga opisyal nga gilambigit sa drugas ang gipangronda, nadakpan ug nabalhog sa prisohan.

Sa miaging semana, gironda ug nasikop si kanhi Medellin mayor Ricardo Ramirez sa kapulisan.

Mga opisyal sa lungsod sa San Fernando una nang nasikop sa dungan nga mga ronda.

Gatusan na usab ang nangamatay sa mga drug pusher nga kaniadto ingon sa naninda og candy sa kadalanan samtang ang matarong nga mga lungsoranon igo ra sa pagsud-ong tungod sa kahadlok.

Bisan kadudahan ang legalidad sa mga anti-drug operation, apan kinabag-an sa katawhan nangalipay. Ngano man? Sa dugay nang panahon, ang publiko gihakop sa tumang kahadlok sa kriminalidad nga gipasagdan sa mga naa sa gahom nga hayan kakunsabo ra usab.

Bisan kon kwestyonable ang pamaagi ni Presidente Rodrigo Duterte, sila namakpak kay ning higayuna, dunay lider nga way kukahadlok nga nagkombate sa illegal drugs.