Hain si Peter Lim?

Mao kini ang pangutana sa mga tawo sa dihang wa magpakita ang magpapatigayon nga si Peter Lim sa dihang gipadad-an siyag subpoena sa Department of Justice (DOJ).

Si Lim usa sa mga tawo nga gihinganlan ni Presidente Rody Duterte nga mga giingong drug lord dinhi a Sugbo. Apan hangtod karon wa pay kaso nga gipasaka batok kaniya.

Nagtago-tago ba si Lim? Matod pa ni Lim, usa kana ka dakong bakak. Ang hinungdan nga wa nila makit-i si Lim mao nga sayop tingali ang lugar nga ilang gipadad-an sa subpoena.

Ang Criminal Investigation and Detection Group (CIDG) 7 niingon nga ilang seguruhon nga moabot gyud ni Peter Lim ang subpoena gikan sa DOJ.

Sumala sa pa mga taho, usa ka security guard lang ang nidawat sa subpoena sa DOJ. Sa ato pa, si Lim nga kauban ni Presidente Duterte isip

sponsor sa usa ka kasal dinhi sa Sugbo, wa na sa Sugbo?

Si Lim, sa usa ka taho sa Sun.Star Cebu niingon nga usa kini ka dakong bakak ug usa ka “fabricated statement.” “It’s a brazen lie.”

Si Cebu City Police Director Senior Supt. Joel Doria niingon nga sigi na silang pangita ni Lim matag higayon nga hisgutan ni Presidente Duterte nga usa siya sa mga dagkong drug lords sa nasud, apan di nila makit-an.

Matod pa ni Doria, “Mula no’ng mabanggit ‘yong pangalan niya ng ating Presidente, in-intensify natin ‘yong investigation, ang monitoring. Pero so far kasi mailap.”

Nganong di man nila makitan si Lim nga matod pa ni Lim wa man siya magtago-tago? Wa man siya moadto sa gawas sa nasud. Dunay kapin sa 4,000 ka Peter Lim sa tibuok Pilipinas, wa gyud sila kakita og usa? Niadtong Hulyo 7 sa miaging tuig, gihinganlan sa presidente ang mga giingong drug lords nga nagpaluyo sa mga sindikato sa illegal nga drugas lakip niadtong mga heneral nga nagprotektar kanila. Naapil si Lim nila ni Wu Tuan alias Peter Co ug Herbert “Ampang” Colanggo, nga nagtingkagol na sa bilangguan.

Ang di nato malimtan mao ang warning sa presidente nga nagkanayon, “If he (Lim) has friends here, tell him, the moment he lands at NAIA (Ninoy Aquino International Airport), he will die.”

Wa tingali moagi si Lim sa NAIA maong buhi pa siya ug makaingon nga dakong bakak nga nagtago-tago siya. Pero ang mamatay kadto ra mang mosukol.