Mga kalingawan ug dapat atngan
Mga pahalipay sa lalawigan sa Cebu sa pagsaulog niini sa ika-448 nga kasumaran sa pagkatukod niini.
Dungan sa kasaulogan ang pagpahigayon sa Ironman nga adto magsugod sa isla sa Mactan ug moabot sa Talisay City ug balik.
Tulo ka Ironman ang akong nasaksihan ug kulba-hinam kaayo ang maong bangga sa paugnat sa kusog nga maglangkob sa langoy, bisikleta ug dagan.
Mga panghinaut sa usa ka malampuson ug malinawon nga pagpahigayon.
Mga pahalipay ngadto ni Liza Sofia Hansen nga nakalangkat sa pwesto nga 1st Runner-up sa bag-o lang natapos nga Princess International 2017 nga didto himoa sa Thailand sa katapusang bahin sa Hulyo.
Maanyag si Liza Sofia nga 12 anyos ang panuigon ug may dugo nga Filipino-Norwegian.
Basin makita na sab ni siya sa telebisyon o pelikula sa di madugay kay nag- workshop na siya sa ABS-CBN niadtong Mayo. Padayon sa pagkab-ot sa imong mga damgo ug pangandoy, Liza Sofia!
Makita na gyud ang pelikulang Patay Na Si Hesus sugod sa Agosto 16. Apil kini sa ipahigayon nga Pista ng Pelikulang Pilipino diin usa ka semana nga pulos pelikulang Pinoy ang isalida sa mga sinehan.
Morag sa Metro Manila Film Festival. Ang Patay Na Si Hesus gibituonan ni Jacklyn Jose isip inahan sa tulo ka mga anak nga gidala nila ni Vincent Viado, Chai Fonacier ug Melde Montanez.
Kini rang pelikulaha ang nigamit sa pinulongang Binisaya o Cebuano mao nga nagkinahanglan kini sa suporta nato nga mga Bisayang Dako.
Wa damha nga mokita og P230 milyon ang pelikulang Kita Kita nga gibidahan nila ni Alessandra di Rossi ug Empoy Marquez. Gitawag sila nga bagong box-office royalties tungod sa kalampusan sa pelikula.
Alempoy ang tawag sa ilang tandem ug Alempoyers ang ilang mga magdadayeg. Kon dako ang ngisi nila ni Alex ug Empoy, tingali mas dako ang ngisi ni Piolo Pascual ug kaubang mga prodyuser.
Sa mga pelikula nga giprodyus sa Spring Films ni Piolo, kini ang nikita og dako ug nanghinaut ko nga tungod niini, mas ganado pa nga mohimog mga ingon niining mga pelikula si Piolo: kinasingkasing, sinsero ug way char-char. Ana! /