I’ve grown enough
Usa ka Domingo sa hapon, nagdali kong misulod sa simbahan kay nagsugod na ang Santos nga Misa.
Every Sunday ko manimba. Sa uwahing lingkoranan ko molingkod, sa may pultahan.
Solemne ang palibot, ang mga tawo sa sulod sa simbahan naminaw sa pari.
Unya nakalingi ko dihang dunay miagi sa akong kilid. Mikuba ang akong dughan bisag nagtalikod na sila nako kay mipadayon paglakaw paingon sa altar. Sila si Ate Renren ug Jonar! Nganong nagkuyog sila?
Wa na ko makapaminaw sa gisulti sa pari dihang nag- homily na siya. Ang akong hunahuna didto na kanila ni Ate ug Jonar nga nagtupad paglingkod duol sa altar. Wa gyud ko makasabot sa akong gibati niadtong tungora. Morag naglagot ko. Morag nagselos ko.
Ako unta ang angay nga ikauban ni Jonar ron sa pagpanimba. Apan wa man sab siya mosulti nako nga magkuyog mi. Aw, wa man sab nuon nako siya sultihi nga magsimbahan ko matag Domingo.
Miuna ko paggawas sa simbahan dihang nahuman na ang Santos nga Misa. Apan wa ko mobiya sa simbahan. Gihuwat ko sila si Ate Renren ug Jonar nga manggawas sa simbahan. Duna koy gustong klaruhon. Unya, nanagko ang akong mga mata dihang migawas na sila. Sus, malipayon kaayo sila, uy, ug nag- holding
hands pa gyud! Nganong naingon ani?
May relasyon sila si Ate ug Jonar?
Nagdali kong milakaw. Nagpamahid ko sa akong mga mata. Wa gyud ko makapugong sa akong kaugalingon. Nakahilak gyud ko sa kalagot, sa selos, sa kahiubos. Kinsa man say malipay, bi?
Gihuwat ko si Ate sa sulod sa among kuwarto. Wa sila si Mama ug Papa sa among balay. Duna silay gilkaw ug unya pang gabii mopauli. Makahigayon ko sa pagsudya sa akong maguwang. Ug dihang nahiabot na si Ate ug nakasulod na sa among kuwarto, hapit ko siya tulisoka.
“Nganong gibakakan ko ninyo ni Jonar? Nganong wa mo motug-an nako bahin ninyo?”
Nadako gyud ang akong tingog. Gipasagdan ko ang akong mga luha nga nagsigeg tulo gikan sa akong mga mata.
Sa tan-aw ko kang Ate Renren, nakalitan siya. Wa siya makatingog nga nagtutok lang nako.
“Nakita ta mo si Jonar sa simbahan!”
Way tingog si Ate Renren nga mitalikod nako.