Gusto mogawas

Dear Papa Joe,

Tawga lang ko sa ngalan nga Mr. Notorious, taga Mambaling, Cebu City, 27 years old ug bag o lang naminyo sa akoang long time girl friend.

Sa wala pa mi maminyo, kini siya naa ni siyay batasan nga pagkaselosa pero buotan. Unya akong gipangutana kon nganong ing ana iyang batasan, niingon siya nga insecure lang kuno siya. Basin makakaplag pa ko og lain. Hangtud nga nangutana ko niya kon mausab pa ba siya ug niingon man siya nga kana kon makasal na gyud mi kay matawag na ko niya nga iyaha. Pila ra may estorya, sud sa unom ka tuig namong panag-uyab, nakahukom ko nga magminyo na mi.

Tuod man, nakasal na mi ug maayo ang dagan sa among relasyon sulod sa pipila ka buwan. Pero lately lang, nagkagrabe na man hinuon iyang pagkaselosa kay ultimo pahumot, did-an ko niya. Ang akong mga senina puro tiniguwang ang dating kay minyo na kuno mi. Kinahanglan nga matured na ko manamit. Unya akong cellphone siya na maggunit permi. Natuok na ko pagayo nga maorag nagmahay ko nganong nagminyo ko. Makagawas pa kaha ko ani? Tambagi ko. MR. NOTORIOUS Mr. Notorious,

Basin notorious gyud ka sa una sa mga chicks mao nga nahadlok ang imong asawa ron. Pero kon buotan ka, mahug nga sayop ka sa imong desisyon nga nagdali-dali ka, Wa gyud nimo ilha ang babaye kung mag malipayon ka ba. O nailhan nimo pero nagpakabuta lang ka mao nga imong nahiaguman.

Well, kon di gyud nimo kaya ug niingon ka makagawas pa ba ka, akong tubag ana pwede. Magpa-annul ka. Mas maayo samtang bag-o pa mong minyo, kon di nimo kaya iyang batasan, ayaw una pagbuhat og bata kay maangin lang ang future. Pero try lang sab nga ma patch up nimo ang inyong mga deperensya.

(sa inyong tampo ipadala lang sa papajoesuperb@ gmail.com)