Ang suwerte ni dory
Mibuhi si Dory og halawom nga panghupaw paglingkod niya sa sopa sulod sa condo unit nga iyang gibalhinan. Ning sayong kahapunon nakahinuktok siya samtang naglibot ang iyang panan-aw sa upat ka bungbong sa mahalon nga condo unit. Pagsumbong niya kang William nga mabdos na siya, gipabiya siya sa trabaho ug gidala dinhi ning condo nga pinili ni William nga mao say nag-abang.
“O, nganong mora man kag wa malipay ining imong nindot nga pinuy-anan?” ni William nga mitupad paglingkod kang Dory dapit sa iyang wala.
Mitutok si Dory sa iyang hinigugma. Promo girl siya sa
cosmetics sa usa dakong Mall sa dakbayan. Atol kadto nga bag-o lang siyang gibuwagan ni Danny kay na-korner sa laing babaye dihang nibutho si William sa iyang kinabuhi. Magul-anon siya usa ka hapon niana nga nagbarog tungod sa
showcase sa mga cosmetic. “Mora mag lonely ka, Miss. Niay kuwarta, pangtaksi nimo. Gi- invite tikag sa Club Ultima. Maghuwat ko nimo didto karong alas siyete sa gabii. Adto na lang ta didto mag-ilaila,” matod sa ambungang lalake nga nagtunol kang Dory og nagburot nga sobre. Unya mibiya ang lalake.
Giablihan ni Dory ang sobre. Bayinte mil pesos ang sulod. Pangtaksi lang sumala sa lalake. Wa makabalibad si Dory sa imbitasyon.
Human sa dinner mi- check in sila sa usa ka mahalong ho- tel. Didto nasayran ni Dory nga dugay na diay siyang gimata-mataan ni William. Sukad niadto milanat og usa ka tuig ang ilang relasyon. Buhong si Dory sa salapi. P200,000 matag bulan ang allowance niya gikan ni William.
“Minyo ko. Pero ang akong asawa dili selosa. Buhong man pod siya sa iyang mga kapritso,” tug-an ni William, usa ka higayon dihang nagdate sila.
Kay dili kapritsosa ug dili gastador si Dory, nakatabang siya sa iyang ginikanan ug mga igsuon mahitungod sa panginahanglan sa kuwarta. Nakabalay silag nindot. Ug wa maglisod sa gastuhan sa pag-eskuyla. Kontento siya kang William nga usa ka adunahang negusyante.
“Hangtod sa hangtod kabit lang gyud ko nimo, Wil!” ni Dory ngadtong William dihang nagdulog na sila sa kama aron mangatulog usa ka gabii niana.
“Kabit na kon kabit! Pero ang imong gisabak atong anak. Makapanunod sab siya sa akong katigayunan. Samtang buhi pa ko, makadawat kas binulan nimong allowance,” ni William.
“Salamat, Wil, salamat!” ni Dory. Gigakos niya si William. Ug gihagkan siya ni William sa mga ngabil.
“Unya, wa man tika higpiti. Makahugoy-hugoy man gihapon kas imong mga paryente ug mga higala,” ni William.
Sa hilom nagpasalamat siya sa iyang suwerte uban kang William.
Sa pagka karon wa gyuy gikabalak-an si Dory. Pinangga kaayo siya ni William. Apan mihukom siya nga dili niya iwaldas ang iyang allowance, kay magamit ra unya kini kon simbako mausab ang huyop sa hangin.