SMB VS. STAR
Lab-as pa sa ilang mainiton nga kadaugan batok sa higpit nga karibal niadtong Miyerkules, ang San Miguel Beer mosuway na usab pagsumpay sa ilang sunodsunod nga kadaugan karong gabii sa PBA Governor’s Cup sa Araneta Coliseum. Ang Beermen nga may 2-0 nga baraha mosuway usab sa katakos sa Star Hotshots nga may 2-0 usab nga baraha sa main game sa double-header nga sugdan sa alas siete ang takna. Niadtong Miyerkules gibuntog sa Beermen ang TNT Ka Tropa, 97-91, sa usa ka physical nga duwa nga gihamok usab ug mainiton nga binayloan sa pulong og gamayng kaguliyang sulod sa korte.
Midayandayan usab sa maong panag-engkuwentro mao ang pagpahamtang og technical fouls nila ni RR Pogoy, Jason Castro, Ranidel de Ocampo sa TNT ug Chris Ross sa San Miguel.
Mitumaw usab ang panaglalis nila ni Ross ug sa import sa TNT nga si Mike Craig.
“It’s really very emotional. At halftime, I told the guys we don’t need to play their game. Very physical sila at very emotional naman si Chris Ross,” matod ni coach Leo Austria sa San Miguel kinsa mibuntog usab sa Blackwater Elite sa ilang unang duwa.
Apan bisan pa man sa kamainiton sa duwa, sila si June Mar Fajardo, Wendell McKines, Marcio Lassiter ug Alex Cabagnot ang migiya sa Beermen batok sa Texters kinsa ilang gipildi sa finals sa miaging conference.
“We’re tentative at the start because of over eagerness, especially Wendell who’s eager to score and to impose himself at the paint. After the first half, we regrouped and became organized,” dugang ni Austria nga napatik sa PBA.ph.
Apan sa dili pa ang Beermen-Star nga panag-engkuwentro, mopakita usab og aksyon ang Katropa ug ning higayona ilang suwayan ang katakos sa wala pay daog nga Alaska Aces sa preliminary game nga sugdan sa alas kwatro sa hapon.
Ang Katropa adunay 1-1 nga baraha samtang ang Alaska padayong nanikaysikay nga may 0-3 nga record.
Bisan pa man sa ilang sunodsunod nga kapildihan, malaumon gihapon ang Aces nga makuha pagbalik ang ilang saktong dinuwaan nga ilang nahupta kaniadto.
Si Calvin Abueva, kinsa sulod sa pipila ka adlaw wala makapakita sa team tungod sa rason nga adunay problema nga gihusay sa pamilya, moduwa na karong gabii apan posibling katapusan na usab kini niyang duwa sanglit molarga na man Gilas Pilipinas alang sa Fiba Asia Cup nga ipahigayon didto sa Lebanon.
May inasikaso lang about sa personal,” matod ni Abueva sa SPIN.ph human sa praktis sa Alaska niadtong Martes. “Pero ngayon bumabawi ako, kasi kailangan namin manalo sa game namin sa Talk ‘N Text ngayong Friday kasi alis na kami ng Saturday pa-Lebanon.”“Quiet na lang ako na hindi magsalita, syempre pine-personal ko ano yung buhay ko ngayon,” dugang niya. JBM /