OSPITAL MANGAYOG DEPOSITO SILUTAN

SA EMERGENCY, MAKUYAW NGA KAHIMTANG; BALAUD GIPIRMAHAN NI DUTERTE

Gipirmahan ni Presidente Rodrigo Duterte ang balaud, nga nag-amendar sa Batas Pambansa 702, nga nagdili sa pagpangayo og deposito kun advance nga bayad alang sa pag-admit sa ospital o pagtambal sa pasyente.

Ubos sa Republic Act (RA) 10932 nga gipirmahan ni Duterte niadtong Agusto 3, bug-at nga mga silot ang ipahamtang ni bisan unsa nga ospital ug medical clinic nga modumili sa pagdapat og tukmang tambal ug mosuporta sa seryusong emergency nga mga kaso.

Sa Section 1 sa RA 10932 naglatid nga kalapasan sa balaud ni bisan kinsa nga personnel sa tambalanan o medical clinic nga mo “request, solicit, demand or accept any deposit or any other form of advance paymeny as a prerequisite for administering basic emergency care to any patient.”

Kon kuwang ang kapabilidad nga medical sa ospital o medical clinic, ang balaud nagtugot nga ang doktor nga nag-atiman mobalhin sa pasyente sa laing pasilidad nga dunay igong kapabilidad sa pag-atiman, basta ang pasyente nakadawat sa gikinahanglang emergency nga pagtambal ug suporta.

Kon way magamit nga ambulansya alang sa emergency nga pagbalhin sa pasyente, gimandoan sa balaud ang local government unit diin ang ospital o medical clinic nahimutang nga motugot sa paggamit sa sakyanan nga libre.

Si bisan kinsa nga personnel sa ospital o medical clinic nga makalapas sa mga probisyon sa balaud mag-atubang og pagkabilanggo og di mominos unom ka buwan ug usa ka adlaw apan di molapas sa duha ka tuig ug upat ka buwan.

Mga makalapas pahamtangan usab og di mominos P100,000 apan di molapas sa P300,000 nga multa.

Kon ang kalapasan nahimo tungod sa gipatuman nga polisiya sa ospital o klinika o tungod sa mando sa management, ang direktor o opisyal sa ospital nga responsable bilangguon og upat ngadto sa unom ka tuig o pamultahon og P500,000 apan di molapas sa P1 million.

Kon ang kalapasan nahimo sud sa tulo ka mga higayon, ang DOH mao nay mo-revoke sa lisensya sa pasilidad nga maka-operate.

Ang balaud nahimo sa pagusa sa Senate Bill 1353 ug House Bill 5159 nga pulos gipalabang.

/ ALLAN DEFENSOR ■ GIPATAY. Gisusi sa kapulisan ug emergency personnel ang patay nga lawas ni Mamerto Relacion, 48, usa ka messenger, taga Brgy. Inayawan, dakbayan sa Sugbo human pusila sa suspek nga si Michael Manatad, sikyu, sa Osmeña Blvd. ug MP Yap Street, dakbayan...