Kanhi mayor pasakaan og kaso

Nakakita og igong basehanan si Ombudsman Conchita Carpio Morales nga pasakaan og kaso si kanhi Naga City Mayor Valdemar Chiong sa Sandiganbayan og kasong kalapasan sa Anti-Graft and Corrupt Practices Act kun Republic Act 3019.

Ang kanhi mayor nakaplagan usab nga giingong sadan sa grave misconduct ug gross neglect of duty ugsiya gidid-an na nga makalingkod og pwesto sa gobiyerno.

Si Chiong pamultahon usab tukma sa iyang usa ka tuig nga sweldo sanglit wala na siya sa serbisyo.

Ang kaso nagsugod human ang kanhi mayor niisyu og permit ngadto sa Petronas Energy Philippines, wholesaler og liquefied petroleum gas.

Si Chiong niawhag sa Office of the Ombudsman nga mohimo og kaugalingon nga imbestigasyon batok sa Bureau of Fire Protection gumikan sa kalangay pag-isyu og fire safety permit, hinungdan nga ang iyang buhatan niisyu og temporaryo nga mayor’s permit ngadto sa PEP.

“Ako ang nag-suffer tungod kay ang BFP walay klarong desisyon sa pag-isyu og fire safety permit sa Petronas,” padayag ni Chiong kagahapon.

Matod niya niluwat siya og conditional business permit sa Petronas sanglit niapilar pa kini sa ulohang buhatan sa BFP aron aprobahan ang ilang aplikasyon alang sa fire safety permit.

Siya nidugang ang lokal ug rehiyonal nga mga buhatan sa BFP nitugot sa aplikasyon sa Petronas apan nalangay kini sa ulohang buhatan human ang kaatbang nga kompaniya nikwestyon sa pag-isyu og permit.